QR Memlekettik kirister komiteti «Tax free» júiesi boiynsha sheteldik týrister qandai taýardy qosymsha qun salyǵynsyz ákete alatynyn atady, dep habarlaidy "Ult aqparat".
Sheteldik týrister úshin Almatydaǵy «Esentai Mall» saýda ortalyǵynda «Tax free» júiesin engizý boiynsha ilki joba qolǵa alynatynyn buǵan deiin de habarlaǵanbyz.
Komitettiń baspasóz qyzmetiniń habaryna qaraǵanda, bul júie Eýraziia ekonomikalyq odaǵynyń kedendik aýmaǵyna júrmeidi.
«Tax free» júiesindegi saýda qyzmeti arqyly satyp alynǵan azyq-túlik emes taýarlarǵa ǵana qosymsha qun salyǵy qaita óteledi. Ol úshin taýarlardyń «Tax free» túbirteginde kórsetilgen quny 20 ailyq eseptik kórsetkishten kem bolmaýy kerek. Satyp alýshy Almaty qalasynyń halyqaralyq áýejaiynyń shekaralyq ótkizý pýnktinen ótkenge deiin satyp alynǵan taýarlardy jáne «Tax free» qujattaryn, satyp alýshyǵa resimdelgen baqylaý-kassalyq mashinanyń túbirtekterin, tólqujatyn jáne otyrǵyzý talonyn kedendik tekserýge kórsetedi», - delingen resmi aqparatta.
