Búgin, 31 tamyzda Astanada QR Qorǵanys ministri Imanǵali Tasmaǵambetov jeńil atletshi, Rio-de-Janeiroda ótken Olimpiada oiyndarynyń qola júldegeri QR QM AOSK-nyń kapitany Olga Rypakovaǵa qurmet kórsetti, - dep habarlaidy "Ult aqparat" vedomstvonyń baspasóz qyzmetine silteme jasap.
"Barsha áskeri qyzmetshilerdiń jáne jeke ózimniń atymnan barlyq armiiashy sportshylardyń kúsh-jigerin atap ótkim keledi. Jáne árine, jeńil atletikada biik shyńdy baǵyndyryp, úshinshi orynǵa qol jetkizgen bizdiń Olga Rypakovany quttyqtaǵym kelip otyr. Sózsiz, barlyq marapattaryńyzdyń ishinde "qola" júldeńizdiń alar orny airyqsha. Elbasymyz - QR Qarýly Kúshterimizdiń Joǵarǵy Bas Qolbasshysy atap ótkendei, ol "altyn" júldege ábden laiyq, sebebi, London men Rio Olimpiadalary arasynda Olga Rypakova symbaty men sporttyq qasietin saqtai otyryp, eki ret ana atanyp úlgerdi". Dál Siz sekildi adamǵa qarap barsha Qazaqstannyń jastary boi túzeidi jáne Siz arqyly naǵyz armiialyq sportty bile bastaidy", - dedi qorǵanys vedomstvosynyń basshysy Imanǵali Tasmaǵambetov.
QR QK Joǵarǵy Bas Qolbasshysynyń atynan Imanǵali Tasmaǵambetov sportshyǵa "Parasat" ordenin tabys etti. Odan basqa, Rioda sátti óner kórsetkeni úshin Olga Rypakovaǵa merziminen buryn kezekti "maior" áskeri ataǵy berilip, baǵaly syilyqtar tabystaldy.
"Men barsha qazaqstandyqtarǵa, Nursultan Ábishulyna, Sizge, AOSK-nyń barlyq basshylyǵyna alǵysymdy bildirgim keledi. Barshalaryńyz maǵan jankúier bolyp, qoldaý kórsettińizder, kóptegen izgi tilekter aityldy. Qazaqstan Respýblikasyna jáne sportqa qyzmet etemin! Men ári qarai da barlyq álemdik arenalarda óner kórsetip, qazaqstandyq sport pen qazaqstandyq armiianyń abyroiyn asqaqtatqym keledi", - dep Olga Rypakova riiasyz rizashylyǵyn bildirdi.
© QR Qorǵanys ministrliginiń baspasóz qyzmeti
QR Qorǵanys ministrligi Armiia ortalyq sport klýbynyń áskeri qyzmetshisi Olga Rypakova Rioda ótken Olimpiadada úsh márte sekirýde 14,74 metr nátije kórsetti. Bul onyń maýsymdaǵy úzdik jeke nátijesi boldy. Olga Rypakova qashyqtyqqa sekirýde 2010 jylǵy álem chempiony, úsh márte sekirý men jetisaiysta Aziia oiyndarynyń eki dúrkin chempiony, Bangkokta (Tailand) ótken úsh márte sekirýde 2007 jylǵy Ýniversiada chempiony, eńbek sińirgen sport sheberi bolyp tabylady. Rio-de-Janeiroda ótken Olimpiadadaǵy qola medal ol úshin mansap jolyndaǵy ekinshi olimpiadalyq medal bolǵanyn aita keteiik. Londonda ótken olimpiadada ol altyn medal iegeri atanǵan bolatyn.
Odan basqa, shveitsariialyq Lozanna qalasynda ótken jeńil atletikadan "Gaýhar odaǵy" halyqaralyq týrniriniń kúmis júldegeri atandy. Olga Rypakova QR QM Armiia ortalyq sport klýbynda 2006 jyldan bastap qyzmet etedi. Bul ýaqyt aralyǵynda ol Barys ordenimen, "Qazaqstan Respýblikasynyń Qarýly Kúshterine 20 jyl" medalimen, Qazaqstan Respýblikasynyń "Eńbek sińirgen sport sheberi" ataǵymen, sondai-aq, "Dene shynyqtyrý, sport pen týrizmdi damytýdaǵy eńbegi" qurmet belgisimen marapattaldy.
Qorǵanys ministri dene daiarlyǵy jeke quramnyń jaýyngerlik qabilettiliginiń negizi bolyp tabylatynyn atap ótti. Sol úshin qazirgi kezde AOSK-da jaýyngerdiń tózimdiligin arttyratyn barlyq túrler boiynsha jattyqtyrý sheberligi baǵdarlamasyn engizý tetigi belsendi túrde ázirlenýde. Bul jeńilatletterimiz úshin ǵana emes, sonymen birge, jekpe-jekshiler, shańǵyshylar, biatlonister jáne ózgeler úshin airyqsha tapsyrma. Búgingi tańda klýbtyń komandalyq quramy birshama keńeitildi. Onyń baǵdarlamasyna kúsh júktemesi, erik pen shydamdylyqty qajet etetin keibir ulttyq sport túrleri (kókpar, aýdaryspaq) qosyldy.
Olga Rypakovadan ózge, qazirgi Olimpiada oiyndarynda qazaqstandyq quramanyń qúramynda Qazaqstan Respýblikasy Qorǵanys ministrligi Armiia ortalyq sport klýbynyń taǵy 9 sportshysy usynyldy. Ol jeńilatlet qatardaǵy jaýynger Mihail Krasilov, bylǵary qolǵap sheberleri aǵa serjant Birjan Jaqypov, efreitor Qairat Eráliev jáne QR QK-niń qyzmetkeri Jánibek Álimhanuly, QR QM AOSK-nyń sportshysy Iýrii Iýrkov - oq atý, 3-synypty serjant Evgenii Alekseev - baidarkalarda esý, kishi serjant Ǵalymjan Úserbaev - erkin kúres, efreitor Rýslan Japarov - taekvondo jáne QR QK-niń qyzmetkeri Elena Potapenko - zamanaýi bessaiys.
Ult portaly
