Foto: ashyq derekkóz
Atyraý oblysy Qyzylqoǵa aýdanyna qarasty Jangeldin aýylynan bir otbasynyń jumbaq jaǵdaida joǵalýyna bailanysty is jańa málimettermen tolyqty. Bul derekter qoǵamda burynǵydan da kóp saýal týǵyzýda, dep habarlaidy kznews.kz.
Áleýmettik jelilerde taraǵan aqparatqa súiensek, ózin atyraýlyq «haker» dep tanystyrǵan belgisiz azamat joǵalyp ketken otbasynyń uly Naýryzǵa tiesili SIM-kartalardyń áli de ara-tura qoldanylyp jatqanyn málimdegen. Onyń aitýynsha, atalǵan nómirlerdiń geolokatsiiasy Ózbekstan aýmaǵynda tirkelip otyrǵan. Sondai-aq bul nómirler arqyly WhatsApp messendjerine kúnine birneshe ret kirý áreketteri baiqalǵan.
Týystarynyń sózinshe, qarasha jáne jeltoqsan ailaryndaǵy zeinetaqy tólemderin de belgisiz bireýler sheship alǵan. Budan bólek, WhatsApp arqyly otbasynyń úi janýarlary satylǵany jóninde aqparat taraǵan. Buǵan deiin hat-habar almasýlardyń otbasynyń ulynyń atynan júrgizilgeni habarlanǵan edi.
Alaida atalǵan «hakerdiń» aitýynsha, memlekettik organdardyń resmi derekterinde joǵalyp ketken otbasy músheleriniń eshqaisysy Qazaqstan shekarasyn kesip ótkeni týraly belgi joq. Soǵan qaramastan, ol Túrkistan oblysynda Ózbekstanǵa ótetin beiresmi shekara joldary bar ekenin, sol baǵyttar arqyly belgisiz adamdardyń ótýi múmkin ekenin alǵa tartady.
Aqparat taratqan azamat memlekettik júielerdi buzbaǵanyn, tek ashyq derekkózderge, SIM-kartalarǵa jasalǵan taldaýlarǵa jáne bailanys operatorlarynan alynǵan málimetterge súiengenin aitady. Sondai-aq onyń kúdik týdyryp otyrǵan bir adamy bar ekenin de atap ótken.
«Men eshqandai júieni buzǵan joqpyn. Tek ashyq aqparat pen tehnikalyq derekterdi saraladym. Baqylaýymsha, SIM-kartalar qoldanysta júr, bul ózdiginen kúmán týǵyzady», – dep jazdy ol.
