Jambyl oblysynda mektep oqýshysyn urlamaq bolǵan kúdiktiler ustaldy, dep habarlaidy Ult.kz.
Oqiǵa keshe Kóshek batyr kóshesindegi avtobýs aialdamasynda, qalanyń eń iri «Uly dala» shaǵyn aýdany mańynda bolǵan. Sabaqtan keiin tis dárigerine bara jatqan 13 jastaǵy oqýshy qyz aialdamada avtobýs kútip turǵan.
Sol sátte aialdamaǵa Volkswagen Polo avtokóligi kelip toqtaǵan. Kólikten túsken eki er adam ózderin qyzdyń ákesiniń tanystary retinde tanystyryp, ony kólikke otyrýǵa úgittegen. Qyz bas tartqannan keiin, olar ony qolynan ustap, kúshpen salonǵa otyrǵyzýǵa áreket jasaǵan.
Aldyn ala málimet boiynsha, bastamashysy – 1988 jyly týǵan jumyssyz T.K. Meditsinalyq saraptama onyń psihoaktivti zattardyń áserinen esirtkilik mas kúide bolǵanyn anyqtaǵan. Tergeý barysynda ol aialdamada beitanys qyzdy kórip, ony keiin nekege turý maqsatynda urlamaq bolǵanyn aitqan.
Oǵan 1984 jyly týǵan týǵan aǵasy K.A. kómektesken. Ol da jumyssyz, ári «paranoidty shizofreniia» diagnozymen psihiatriialyq esepte turǵany belgili boldy.
Qyz aiqailap, qarsylyq kórsetip, kóliktiń esigin ustap, ishke iterip jibermeýge tyrysqan. Osy sátte janynda bolǵan er adam (jeke derekteri jariia etilmeidi) aiqaiǵa nazar aýdaryp, aralasqan. Qyzdyń bul adamdardy tanymaitynyn bilgen soń, ol balany kúdiktilerdiń qolynan julyp alyp qalǵan.
Osydan keiin kúdiktiler kólikke otyryp, oqiǵa ornynan izin sýytqan. Alaida kóp uzamai ekeýi de ustalyp, ýaqytsha ustaý izoliatoryna qamaldy.
Atalǵan fakti boiynsha kámeletke tolmaǵan qyzdy urlaýǵa oqtalý baby boiynsha qylmystyq is qozǵaldy. Tergeý amaldary júrgizilýde.
Bul oqiǵa kúndiz, adam kóp júretin jerde bolǵan. Eger janyndaǵy azamat beijai qaramai, aralaspaǵanda, jaǵdaidyń sońy qaiǵyly aiaqtalýy múmkin edi.
