Jambyl oblysyndaǵy jarylystan zardap shekken taǵy bir órt sóndirýshi qaitys boldy, dep habarlaidy QR TJM baspasóz qyzmeti.
«Búgin Jambyl oblysyndaǵy jarylystan zardap shekken 1993 jyly týǵan órt sóndirýshi qaitys boldy. Ol buǵan deiin Nur-Sultan qalasyndaǵy Travmatologiia jáne ortopediia ǵylymi-zertteý institýynyń aýrýhanasyna jetkizilip, sol jerde em alyp jatqan bolatyn» delingen habarlamada.
Osylaisha Jambyl oblysyndaǵy jarylys saldarynan qaza tapqandar sany on jeti adamǵa jetti. Onyń ishinde 10 azamattyq qorǵaý organdarynyń qyzmetkeri, Qorǵanys ministrliginiń 6 áskeri qyzmetkeri jáne bir áskeri prokýror. Joǵalǵan taǵy bir adam izdestirilýde.
Qaitys bolǵan órtsóndirýshi - Turmanov Jánibek Jasuzaquly.
Aita keteiik, 26 tamyz keshke Jambyl oblysynyń áskeri bólimindegi qoimada órt bastalyp, bir saǵattan keiin qoimada oq-dáriler jaryldy. Kem degende 10 jarylys bolǵan.
Jaqyn mańdaǵy aýyldardyń 1 200-ge jýyq turǵyny qaýipsizdik maqsatynda Tarazǵa kóshirildi. Oqiǵadan keiin qorǵanys ministri bolǵan Nurlan Ermekbaev otstavkaǵa ketti, onyń ornyna Murat Bektanov taǵaiyndaldy. Qaiǵyly oqiǵa boiynsha tergeý júrgizilip jatyr.
