Órt sóndirýshi Baibek Sembekov "Stýdiia 7" jobasynyń tilshilerine ekskliýziv suhbat berdi. Ol Jambyl oblysyndaǵy oqiǵa týraly aitty, - dep habarlaidy Tengrinews.kz.
Qaraýyl bastyǵy Baibek Sembekov Taraz mańyndaǵy jarylystardan aman qalǵan. "Stýdiia 7" jýrnalisteriniń aitýynsha, ol qazir emdelip jatyr.
"Oqiǵa ornynan jetkende, men birden áskeri qyzmetkerlerdiń birine bardym. Qoimada ne bar ekenin suradym... Olar arnaiy jarylǵysh zattar joq ekenin aitty. Biz birden jumysymyzǵa kiristik. Men sý kózin izdei bastadym. Bizdiń kólikterde maksimým 5-8 tonna sý bar, biraq ol jetkiliksiz bolar edi", - dep eske aldy Sembekov.
"Barlyq kólik qoimaǵa jaqyndasyn degen buiryq boldy. Men kólikke otyrdym, janymda bir qyzmetker men júrgizýshi boldy. Kólikke otyra salysymen, júrýge buiryq berdim. Sol sátte jarylys boldy".
"Biz otyrǵan kólik aýdaryldy. Artqy oryndyqqa ótip, qalai shyqqanymyz qazir esimde joq. Esik nemese tereze arqyly shyqtyq. Adamdar aiǵailap, jylap júrgender boldy".
"Joiqyn tolqyn boldy. Birdeńe aitaiyn desem, sóilei almaimyn. Aýzyma áinek synyqtary tolyp qalǵan. Qan túkirip jattym. Báriniń jaǵdai sol, kóliktiń aldyńǵy terezesi synyp ketken".
"Birinshi jarylystan keiin on minýt ótken soń, ekinshisi boldy. Biz bárimiz jerge jattyq. Bireýdiń aiaǵy synǵan. Bir-birimizge kómektesip, ol jerden ketip qaldyq. Basqa amalymyz bolmady, tek ol jerden ketý kerek boldy".
Baibek Sembekov keibir áriptesteriniń qaitys bolǵanyn keiin telefon arqyly bilgen.
Órt sóndirýshige "jarylystar bolýy múmkin ekenin eskertpegenderge shaǵymyńyz bar ma" degen suraq qoiyldy. Ol qatardaǵy áskeri qyzmetkerler qaýip týraly bilmeýi múmkin degen boljammen naqty jaýap bergen joq.
Tolyq suhbatty "Stýdiia 7" YouTube-arnasynan kóre alasyz.
Buǵan deiin qutqarýshylar Asyl Muhambetjanov pen Almaz Tursynov tótenshe jaǵdai ornyna kelgende órt sóndirýshilerge jarylys bolmaityny aitylǵany týraly málimdegen bolatyn. Keiinirek bul málimdemelerge Tótenshe jaǵdailar men Qorǵanys ministrligi bastyǵy túsinikteme berdi.
