Jambyl oblysynda tamyzdyń aiaǵynda Taraz mańyndaǵy jarylys kezinde habar-osharsyz ketken áskeri Baýyrjan Dáýitbaevty izdeý jumystary áli de júrip jatyr, - dep habarlaidy Tengrinews.kz tilshisi aimaq ákiminiń baspasóz qyzmetine silteme jasap.
Izdestirý jumystaryna 500-den asa adam tartyldy, olardyń ishinde Jambyl oblysy politsiia departamentiniń, TJ departamentiniń qyzmetkerleri, QR Ulttyq ulanynyń 5513 jáne "Ońtústik" óńirlik qolbasshylyǵynyń 91678 áskeri bóliminiń áskeri qyzmetshileri, "Ormanshylar" azamattyq personalynyń ókilderi jáne týystary bar. Olar úsh topqa bólindi.
Barlyǵy 50 tehnika jumyldyryldy. Arnaiy tikushaq ta iske qosylǵan. Izdeý jasaqtary taýly jerlerdi de sholyp jatyr. "Ońtústik" óńirlik qolbasshylyǵynyń 91678 áskeri bóliminiń qyzmetshileri izdeýge atpen attandy.
"Jambyl oblysy ákiminiń tapsyrmasymen habar-osharsyz ketken jaýynger Baýyrjan Dáýitbaevty izdeý sharalary kúsheitildi. Izdestirý jumystary birden birneshe baǵytta júrgiziledi jáne bir sátke de toqtamaidy", - dedi Jambyl oblysy ákiminiń orynbasary Talǵat Mamaev.
Joǵalǵan áskeridiń aǵasy Marat Dáýitbaev ta izdestirýge belsene qatysýda.
"Birinshi izdestirý tobymen birge jaqyn mańdaǵy eldi mekenderdiń aýmaqtaryn áýeden sholyp shyqtyq. Ókinishke qarai, izdeý sharalary nátije bermedi. Biraq biz úmit úzbeimiz jáne aǵamyzdy tabamyz degen senimdemiz", - dedi ol.
Kishi serjant Baýyrjan Dáýitbaev 26 tamyzda keshke Taraz mańynda áskeri bólimdegi qoima jarylysy kezinde joǵalyp ketti. Ol qaza tapqandardyń qatarynda joq, tótenshe jaǵdai ornynda áskeri qyzmetshiniń máiiti tabylmady. Dáýitbaev - áli tabylmaǵan jalǵyz adam.
