QR Mádeniet jáne sport ministrliginiń Týrizm indýstriiasy komitetiniń tóraǵasy Dastan Ryspekov tamyzda Tailand pen Grýziiaǵa áýe reisteri ashylýy múmkin ekenin málim etti, dep habarlaidy "Ult aqparat".
«Ózderińiz biletindei, shyǵý týrizmi boiynsha osy jyldyń 26 maýsymynan bastap Túrkiia men Ońtústik Koreiaǵa halyqaralyq qatynas ashylǵan bolatyn. 2020 jyldyń 20 maýsymy men 4 shildesi aralyǵynda 622 qazaqstandyq azamat týrkompaniia qyzmetterin paidalanyp, Túrkiiada demalýǵa múmkindik aldy. Osylaisha shyǵý týrizmi salasyndaǵy kompaniialar týrister aldyndaǵy, onyń ishinde buryn aýystyrylǵan joldamalar boiynsha óz mindettemelerin oryndaýdy bastady», - dedi Dastan Ryspekov OKQ-da ótken baspasóz máslihatynda.
Komitet tóraǵasynyń aitýynsha, ókinishke qarai epidemiologiialyq jaǵdaidyń nasharlaýyna bailanysty qazirgi ýaqytta Túrkiiaǵa reister ýaqytsha toqtatylǵan.
«Epidemiologiialyq jaǵdaidyń jaqsarǵanyn eskere otyryp, qazirgi ýaqytta birqatar eldermen áýe qatynasyn qalpyna keltirý máseleleri qarastyrylýda. Onyń ishinde tamyz aiynda Tailand pen Grýziiaǵa reister ashý josparlanǵan», - dedi ol.
