Almaty qalalyq qoǵamdyq densaýlyq saqtaý basqarmasynyń basshysy Nariman Tabynbaev biylǵy jyldyń 30 qyrkúiegine deiin aldaǵy úsh aiǵa arnalǵan koronavirýs boljamyn aitty, dep habarlaidy "Ult aqparat".
Negizgi boljamǵa sáikes, aýrýdyń shyńy tamyzdyń birinshi onkúndiginde bolady, kúnine 1600-ge jýyq jańa jaǵdai tirkeledi.
Pessimistik boljamǵa sáikes, aýrýdyń sharyqtaý shegi 10-11 tamyzǵa keledi, táýligine 1900-ge deiin jańa jaǵdai tirkeledi.
Tamyz aiynda - 34 500 jaǵdai, al 2021 jyldyń qyrkúieginde 4 500 jaǵdai tirkelip, aýrý kórsetkishi tómendeidi dep boljanyp otyr.
«7 myń infektsiialyq tósek-oryn daiyndaldy. Rezervte qosymsha 3000 tósek-oryn bar. Qiyn jaǵdai úshin taǵy 2000 rezervtik tósek-oryn izdestirilýde. Sonymen qatar balalar men eresekterge, sonyń ishinde onkologiialyq turǵyndarǵa jedel jáne mamandandyrylǵan meditsinalyq kómek kórsetý úshin barlyq mamandandyrylǵan klinikalar saqtalǵan. 6 400 tósek-oryn bar», – dedi Nariman Tabynbaev.
Onyń aitýynsha, 27 shildedegi jaǵdai boiynsha statsionarlarda 3 827 naýqas jatyr, onyń 239-y - balalar.
Óte aýyr jaǵdaidaǵy naýqastar – 114. Aýyr jaǵdaidaǵy naýqastar – 956. Infektsiialyq statsionarlarda 500 reanimatsiialyq tósek-oryn bar.
Jumys júktemesi –52% (260 patsient). Ókpeni jasandy jeldetýge 29 patsient qosylǵan.
Ókpeni invazivti emes jeldetýde – 105 naýqas jáne High Flo-da – 99 patsient.
«Shtammdar agressivti áser etýde, sonyń saldarynan ólim sany artýda. Barlyq kezeńde qaitys bolǵandar sany – 1092. Biyl 1 qańtar men 26 shilde aralyǵynda 703 adam qaitys boldy. KVI-men kúreske 6 212 meditsina qyzmetkeri jumyldyryldy. Rezervte 1700-den astam adam bar. Bul jumys baqylaýǵa alynǵan», – dedi qoǵamdyq densaýlyq saqtaý basqarmasynyń basshysy.
