AQSh áskerileri men sheneýnikteriniń aitýynsha, "Taliban" qozǵalysy úkimet kúshteriniń negizgi arsenalyn basyp alyp, álemdegi eń qýatty terroristik topqa jáne Ortalyq Aziiadaǵy eń qýatty áskeri kúshterdiń birine ainalǵan.
Reuters agenttigi málimetinshe, atys qarýy, granatomet pen minomet sany júz myńnan asady. Bir kezderi Amerika Qurama Shtattary aýǵan armiiasyna keminde 600 myń jaiaý ásker qarýyn, 162 myń bailanys quraldary men 16 myńǵa jýyq túnde kórý quraldaryn jetkizgeni habarlandy. "Taliban" qozǵalysy ókilderi munyń bárin áleýmettik jelilerde belsendi túrde kórsetti.
AQSh úkimetiniń esep berý basqarmasy (GAO) málimetinshe, 2002-2017 jyldar aralyǵynda AQSh Aýǵanstan áskerilerine qarý-jaraq, sonyń ishinde artilleriia, zymyrandar, túnde kórýge arnalǵan kózildirik, tipti shaǵyn ushqyshsyz ushý apparattary úshin 28 milliard dollarǵa jýyq qarajat bólgen. Amerikalyq Black Hawk tikushaqtary Aýǵanstan áskeriniń tálipterge qarsy eń kúshti qarýy bolǵan.
Amerika Qurama Shtattary 2003-2016 jyldar aralyǵynda aýǵan áskerlerine 208 ushaq bergen. Ótken aptada bul ushaqtardyń kópshiligi tálipterden qashqan aýǵan ushqyshtary úshin paidaly boldy.
AQSh sheneýnikteriniń biriniń aitýynsha, 40-50 ushaqty pana izdegen ushqyshtar Ózbekstanǵa jetkizgen.
AQSh-tyń qazirgi jáne burynǵy sheneýnikteri bul qarý-jaraq, tehnikany halyqqa qarsy qoldaný yqtimaldyǵy óte joǵary ekenin aitady. Buǵan qosa, tálipter qarýdy Qytaiǵa nemese Reseige satýy da múmkin dep kúdikteledi.
Aita keteiik, AQSh prezidenti Djo Baiden ákimshiligi bul jaǵdaiǵa qatty alańdaýshylyq bildirip, birneshe nusqany qarastyryp jatqany aitylǵan bolatyn.
