Jýrnalister Nemat Nakdi men Taki Dariabi
"Taliban" qozǵalysynyń sodyrlary (Qazaqstanda terroristik uiym sanalady) Etilaate Roz gazetiniń eki jýrnalisin Kabýlda áielderdiń narazylyq aktsiiasynan habar taratqany úshin aiaýsyz sabaǵan. Bul týraly Reuters agenttigi basylymnyń bas redaktoryna silteme jasap habarlady.
Sodyrlar reportaj daiyndap júrgen jýrnalister Nemat Nakdi men Taki Dariabidi ustap, odan soń olardy qamshymen sabaǵan.
Etilaate Roz gazetiniń negizin qalaýshy ári bas redaktory Zaki Dariabi eki tilshiniń sýretin áleýmettik jelilerde jariialady. Ekeýiniń de denesinde qyzarǵan izder qalǵan.
"Bes áriptesti qamaý ortalyǵynda tórt saǵattan astam ýaqyt ustap, eki tilshini tórt saǵat boiy sabaǵan, aiaýsyz azaptaǵan" dedi redaktor.
Jýrnalister aýrýhanaǵa tústi.
Ótken aida tálipter Aýǵanstannyń batysynda Deutsche Welle jýrnalisiniń bir jaqyn týysyn óltirip, taǵy bireýin jaralady. Mediakompaniia basshylyǵynyń málimeti boiynsha, sodyrlar jýrnalistiń ózin izdegen. Bul ýaqytta ol Germaniiada bolǵan. Jýrnalistiń týystary sodyrlardan tyǵylýǵa májbúr bolǵan. Málimetterge qaraǵanda, Kabýl mańynda tálipter mediakompaniianyń kem degende úsh qyzmetkeriniń úiin tintigen.
Tálipter 7 qyrkúiekte buqaralyq aqparat quraldaryna Aýǵanstandaǵy narazylyq aktsialarynan habar taratýǵa tyiym salatynyn málimdedi. Qozǵalys ókili Zabihýlla Mýdjahid jýrnalisterdi mitingilerden aýlaq júrýge úndedi. "Bul aktsiialar zańsyz, BAQ olardy túsirmeýi kerek. Buqaralyq aqparat quraldarynan narazylyqtan habar taratpaýyn suraimyz" dep málimdedi ol.
