Aýǵanstan syrtqy ister ministri Ámir Han Mýttaki jýrnalisterdiń suraqtaryna jaýap berip jatyr. Kabýl, 14 qyrkúiek 2021 jyl.
"Taliban" radikaldy qozǵalysy (Joǵarǵy sot sheshimine sáikes, Qazaqstanda qozǵalysqa tyiym salynǵan) Niý-Iorkte ótip jatqan BUU Bas assambleiasynyń otyrysyna qatysýǵa jáne álem basshylary aldynda sóz sóileýge ótinish bildirdi. Bul týraly BUU resmi ókili Stefan Diýjarrik habarlady.
Onyń sózine qaraǵanda, BUU bas hatshysy Antoniý Gýterrishke "Talibannan" joǵary deńgeidegi pikirtalasqa qatysý jóninde ótinish hat kelgen. Hat BUU Bas assambleiasyna bir kún qalǵanda iaǵni, 20 qyrkúiekte jazylǵan. Oǵan Aýǵanstan syrtqy ister ministri Ámir Han Mýttaki qol qoiǵan.
"Taliban" hatta BUU jiynyna qatysyp qana qoimai, BUU-nyń ókili retinde Muhammed Sýhail Shahindi taǵaiyndaitynyn da jetkizgen.
Hatta Aýǵanstannyń burynǵy prezidenti Ashraf Ǵani 15 tamyzda bilikten ketirilgendikten álem elderi ony prezident retinde moiyndamaityny jazylǵan. Sol sebepti qazirgi aýǵan elshisi Gýliam Isakzai da jiynda Aýǵanstan atynan sóilei almaidy dep kórsetilgen.
BBC saitynyń jazýynsha, seisenbi kúni BUU otyrysynda Katar álem elderin "Talibanmen" bailanys úzbeýge shaqyrǵan.
Al BUU ókiliniń aitýynsha, Gýterrish 15 qyrkúiekte Gýliam Isakzaidan assambleianyń 76-sessiiasyna qatysatyn aýǵan delegattarynyń tizimin alǵan.
