Taldyqorǵan qalasynyń ákimi Dastan Shaltabaevqa qatysty qyzmettik tekseris bastaldy. Bul jóninde Almaty oblysy ákiminiń baspasóz hatshysy Ǵalymurat Júkel málim etti, dep habarlaidy QazAqparat tilshisi.
«Taldyqorǵan qalasynyń ákimi Dastan Shaltabaevqa qatysty qyzmettik tekseris aiaqtalysymen qosymsha tolyq málimet beretin bolamyz. Keshe Almaty qalasynda toqtatylǵan kóliktiń ishinen tapansha jáne dollar aqsha tabylǵan. Sol kólikti tizgindegen qala ákiminiń uly bolýy múmkindigi aitylýda. Onyń Dastan Shaltabaevtyń uly ma, joq pa anyqtap jatyr. Sondai-aq tabylǵan aqshanyń qaidan shyqqany, onyń ne aqsha ekeni tekserilýde», - dedi Ǵalymurat Júkel.
Degenmen, baspasóz hatshysy aqparat rastalǵan jaǵdaida qala ákimine naqty qandai shara qoldanylatynyn aita almady. Al Dastan Shaltabaev ákimdik qyzmetin, iaǵni jumysyn jalǵastyryp jatqanyn málim etti.
Aita keteiik, 28 naýryz kúni Almaty qalasynda tártip saqshylary aldynǵy terezesi qarańǵylanǵan Toyota Camry kóligin toqtatqan. Biraq ony tizgindegen azamatta júrgizýshi kýáligi bolmaǵan jáne kóliktiń ishinen travmatikalyq tapansha men dollar valiýtasynda aqsha tabylǵan.
«Bul zattardyń kimge tiesili ekenin ol túsindire almady. «Meniki emes» dep aqtaldy. Kóliktiń esepten shyǵarylǵany, alaida qaita tirkelmegeni belgili boldy. Qazir oǵan qatysty QR QK 287-babynyń 2-bóligimen qarý jaraqty saqtaý, ustap júrý, satý boiynsha qylmystyq is qozǵaldy. Kólik iesi mashinasyn bireýge ruqsatsyz bergeni úshin ákimshilik jaýapkershilikke tartyldy. Kólik aiyp turaǵyna qoiyldy», - dedi qalalyq Politsiia departamentinen.
