Túrkistan oblysynda Syrdariia ózenine batyp ketken eki aǵaiyndynyń da denesi tabyldy, dep habarlaidy ult.kz.
Qaiǵyly oqiǵa 22 tamyzda Saýran aýdanyna qarasty Úshqaiyq aýyldyq okrýgi aýmaǵynda bolǵan. Aldyn ala málimet boiynsha, 2002 jyly týǵan azamat sýǵa túsýge tyiym salynǵan aýmaqta shomylyp júrip, ózenge batyp ketken.
Ony qutqarýǵa áreket jasaǵan 1998 jyly týǵan aǵasy da sýǵa túsip, aǵysqa ketken.
Qutqarýshylardyń izdestirý jumystary birneshe kúnge sozyldy. 24 tamyzda 2002 jyly týǵan azamattyń denesi oqiǵa ornynan shamamen 6 shaqyrym jerden tabylyp, sýdan shyǵaryldy.
Al 25 tamyzda ekinshi azamattyń denesi oqiǵa ornynan shamamen 30 shaqyrym qashyqtyqtan anyqtaldy. Qutqarýshylar marqumnyń denesin sýdan alyp shyqty.
Izdestirý-qutqarý jumystaryna 90-ǵa jýyq adam jumyldyryldy. Sonymen qatar arnaiy tehnika, júzý quraldary men drondar paidalanylǵan.
Oqiǵaǵa qatysty tiisti jumystar júrgizilip, qaiǵyly jaǵdaidyń mán-jaiy anyqtalyp jatyr.
