Shymkenttegi dendrosaiabaqtyń kireberisinde ornalasqan jyljymaly dámhana mańynda janjal shyǵyp, jasóspirim jaraqat aldy. Oqiǵa boiynsha politsiia qylmystyq is qozǵady, dep habarlaidy ult.kz.
Oqiǵa 17 tamyz kúni keshki ýaqytta bolǵan. Áleýmettik jelide janjaldan keiingi jaǵdai túsirilgen fotosýretter tarady. Jazba avtorynyń málimetinshe, oqiǵaǵa fýdtrakta jumys isteitin kámeletke tolmaǵandar qatysqan.
Shymkent qalasy politsiia departamenti bul aqparatty rastady. Vedomstvo málimetinshe, jaraqat alǵan jasóspirim meditsinalyq kómek kórsetý úshin aýrýhanaǵa jetkizilgen. Oqiǵaǵa qatysýshylar anyqtalǵan.
Qazir politsiia janjaldyń naqty qalai bolǵanyn, oǵan ne sebep bolǵanyn jáne barlyq qatysýshylardyń áreketin anyqtap jatyr.
Sonymen qatar kámeletke tolmaǵandardyń zańdy ókilderin jaýapkershilikke tartý máselesi qaralýda. Politsiia ata-analardyń balalardy tárbieleý jáne olardyń qaýipsizdigin qamtamasyz etý jónindegi mindetterin tiisinshe oryndaǵan-oryndamaǵanyn teksermek.
Tekserý nátijesinde oqiǵaǵa qatysy bar barlyq tulǵanyń áreketine quqyqtyq baǵa berilip, zańǵa sáikes shara qabyldanady.
