Almaly aýdandyq soty Sulpak dúkeniniń mańynda otalǵan aǵashtarǵa qatysty iske úkim shyǵardy, dep habarlaidy "Ult aqparat".
Sot JK ókili Janna Nurtaevaǵa qatysty isti QR QK 339-baby, 1-bóligi "Ósimdikterdiń sirek kezdesetin jáne quryp ketý qaýpi bar túrlerin joiý" boiynsha qarady.
Qyzyl kitapqa engen emen aǵashtaryn kesý isi boiynsha kúdikti dep tanylǵan Janna Nurtaeva aiyppul tóleitin boldy.
"Sot Janna Nurtaevany Qazaqstannyń Qylmystyq kodeksiniń 339-baby 1-bóliginde kózdelgen qylmystyq quqyq buzýshylyq jasaǵany úshin kináli dep tanyp, 55-babynyń 4-bóligin qoldana otyryp, 1500 AEK mólsherinde, iaǵni 4 million 167 myń teńge somasynda aiyppul túrinde jaza taǵaiyndady. Aiyppuldy tóleý merzimi zańdy kúshine engennen keiin eki ai dep belgilensin", - dedi sot.
Buǵan deiin, sot otyrysynda memlekettik aiyptaýshy sýdiadan kinálige bas bostandyǵyn aiyrý jazasyn taǵaiyndaýdy suraǵan bolatyn.
«Aiyptalýshy bul jumyspen jyldar boiy ainalysyp keldi. Ol jasyl jelekterdi kesýge tyiym salý týraly zańdy bilýi kerek. Probatsiialyq baqylaý ornatyp, kásipkerlik qyzmetpen ainalysý quqyǵynan aiyrýdy jáne 4 jylǵa sottaýdy suraimyn», - dedi prokýror.
Sottalýshy óz kinásin ishinara moiyndap, sottan 339-bapty 340-bapqa aýystyrýdy suraǵan edi.
«Meniń kámeletke tolmaǵan balalarym jáne qart ata-anam bar, bul sheshim olar úshin úlken soqqy bolady. Almaty turǵyndarynan jasaǵan isim úshin keshirim suraimyn. Muny eskerýińizdi ótinemin, qurmetti sýdia. Keshirińiz. Men endi ne istegenimdi túsindim. Men áli jaspyn, sondyqtan Almaty úshin kóp nárse jasaýǵa tyrysamyn. Aǵash otyrǵyzamyn, kógaldandyrý jumystaryna atsalysamyn. Men ózimdi aqtap jatqan joqpyn. Biraq sizden jazany jeńildetýińizdi suraimyn. Meniń kishkentai balalarym bar, menen basqa olardy tárbieleitin eshkim joq», - dedi Janna Nurtaeva.
Eske salaiyq, byltyr 23 qarasha kúni Almatyda saýda úiiniń janyndaǵy jaiqalǵan emen men qaraǵash otaldy. Bul týraly turǵyndar áleýmettik jelide narazylyq bildirdi.
Keiin Almaty qalalyq jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Prezident Qasym-Jomart Toqaev Almaty qalasy Tóle bi kóshesindegi aǵashtardyń otalǵanyna qatysty jaǵdaiǵa nazar aýdardy.
Memleket basshysy Almaty ákimi Baqytjan Saǵyntaevqa atalǵan jaǵdaiǵa bailanysty qyzmettik tekserý júrgizip, kinálilerdi jaýapkershilikke tartýdy tapsyrdy.
Al, biylǵy jyldyń naýryzynda Sulpak dúkeni aldyndaǵy aǵashtardyń otalýyna qatysty is sotqa berildi.
