Túrkistan qalasynda «Uly dalanyń uly kúishisi» atty kezdesý is-sharasy ótti. Onda kúishi-kompozitor Súgir Áliulynyń muralaryna arnalǵan «Teriskei tolǵaýlary» kitaby tanystyryldy, dep habarlaidy "Ult aqparat" «Áziret Sultan» memlekettik tarihi-mádeni qoryq-mýzeiine silteme jasap.
Sharada kúishilerdiń qazaq óneri men mádenietine qosqan úlesin nasihattaý, kúilerdi jańǵyrtý, zertteý máseleleri talqylandy.
«Áziret Sultan» memlekettik tarihi-mádeni qoryq-mýzeiiniń qoldaýymen jaryq kórgen «Teriskei tolǵaýlary» kitabynyń avtory - Qazaq Ulttyq óner ýniversiteti «Dombyra» kafedrasynyń professory, kúishi, Qazaqstannyń eńbek sińirgen qairatkeri Janǵali Júzbai.
Kitap Qorqyt baba murasynyń jalǵasy Yqylastyń shákirti, Qarataý kúishilik mektebiniń negizin qalaýshy, kúishi-kompozitor Súgir Áliulynyń muralaryna arnalǵan.
Kitapta Súgirdiń 60 kúii jáne onyń ustazdary men onyń ónegesin kórgen shákirtteriniń sirek oryndalatyn týyndylary jinaqtalǵan.
«Teriskei tolǵaýlary» kitaby antologiialyq sipattaǵy ádebiet bolady dep oilaimyn. Kitap arnaiy kásibi mýzykalyq bilim beretin oqý oryndaryna oqý quraly retinde, mádeni óner oshaqtaryna mýzykalyq-tanymdyq ádebiet retinde usynylady. Atalmysh eńbek Súgir kúishiniń murasyn qurmet tutatyn barsha oqyrman aýditoriiasynyń qajetine jaraityn ádebiet bolady dep úmittenemin. Kitaptyń ishinde jańalyq óte kóp. Basym bóligi buryn jariialanbaǵan kúiler. Kitapqa zamanynda ózi ónege kórgen jáne batasyn alǵan ustazdary – Táttimbet Qazanǵapuly, Yqylas Dúkenuly, Saidaly sary Toqa, Bapysh Qojamjaruly, Satybaldy Begaidaruly syndy halyq kúishileriniń týyndylary men Súgir mektebiniń ókilderi, onyń ishinde Asqar Súleimenov, Myrzatai Joldasbekov, Kóbdik Kárbozov, Jappas Qalambaev, Tólegen Mombekov, General Asqarov syndy kóptegen kompozitorlardyń kúileri kirdi. Súgir Áliulynyń oryndalmaǵan kúileri óte kóp.
Revoliýtsiiaǵa deiingi, sovet kezeńindegi, Sozaq kóterilisi, dala ańyzy siiaqty kúileri birneshe taraýǵa bólinedi.
Kitapqa engen kúilerdi zerttep, izdep, notaǵa túsirý, olarǵa mýzykalyq analiz jasaý siiaqty máselelerge 15 jyldai ýaqytymdy arnadym«, - dedi kitaptyń avtory, belgili kúishi Janǵali Júzbaev.
Onlain formatta ótken jiynǵa «Áziret Sultan« memlekettik tarihi-mádeni qoryq-mýzeii direktorynyń mindetin atqarýshy Ersin Tájibaev, memleket qairatkeri Myrzatai Joldasbekov, jazýshy Qulbek Ergóbek, kúishi Janǵali Júzbai, súgirtanýshy Mádi Baidáýletov, Súgir Áliulynyń urpaǵy, nemeresi Qaldan Tursynbaev, Qurmanǵazy atyndaǵy ulttyq konservatoriiasynyń professory Erjan Jámeńkeev, Shymkent mýzyka kolledjiniń aǵa oqytýshysy Marat Anashev jáne tarihshylar men ǵalymdar, jas kúishiler, ulttyq aspapta oinaýshylar qatysyp, oi-pikirlerimen bólisti.
