Sýdanda altyn kenishindegi apat saldarynan 40-tan astam adam qaza tapty. Bul derekti sársenbi kúni Al Arabiya telearnasy keltirdi, dep habarlaidy QazAqparat.
Telearnanyń aqparatyna sáikes, qazirgi kezde qutqarýshylar aman qalǵandardy tabý maqsatynda izdeý jumystaryn jalǵastyryp jatyr. Buǵan deiin ken ornynda 46 adam bolǵany týraly habarlanǵan.
Jeksenbi kúni Batys Kordofan shtatyndaǵy En-Nýhýd aýdanyndaǵy Ýmm-Darsaia jeke menshik altyn kenishinde apat bolǵan. Birden birneshe uńǵyma opyrylyp túsken, saldarynan jerdiń astynda bolǵan kenshiler joǵaryǵa shyǵa almai qalǵan.
Bul qazba orny burynnan beri apatty dep sanalǵan. Qańtarda jynystardyń opyrylýynan tórt kenshi qaza taapqan edi. Budan buryn bilik kenishte jumys júrgizýge tyiym salyp, nysanǵa arnaiy kúzet qoiǵan. Alaida shamamen eki ai buryn kúzet shahtadan ketken kezde jumysshylar qaitadan kelip, zańsyz altyn óndirýdi jalǵastyrǵan.
