Foto: Májilis
Búgin tańerteń Atbasar aýdanynda Jabai ózenindegi sýdyń deńgeii 5,95 metrge jetip, arnasynan asyp tasydy. Osyǵan bailanysty aýdan ákimi Amanbek Qaljanov turǵyndarǵa úndeý tastap, tótenshe jaǵdai jariialanǵanyn habarlaidy, - «Ult aqparat» Kazinform-ǵa silteme jasap.
Ákimniń úndeýi Atbasar aýdany ákimdiginiń jelidegi resmi paraqshasynda jariialandy.
«Biylǵy jyldyń 11 sáýirinde Jabai ózeninde sý deńgeiiniń kúrt ósýine bailanysty saǵat 04:43-te topyraqpen qorshalǵan bógetiń alty ýchaskesi buzylyp, sý qalaǵa kirdi. Sý deńgeii tez kóterilip, qaýipti deńgei 5,95 metrge jetti. Osyǵan bailanysty sý tasqyny qaýpi bar aimaqtyń barlyq turǵyndary úilerin bosatýy kerek. Qazirgi ýaqytta aýdanda tótenshe jaǵdai rejimi jariialandy», - dedi aýdan basshysy turǵyndarǵa.
Sonymen birge, aýdan ákimi turǵyndardy dúrbeleńge túspeýge shaqyrdy.
Sonymen qatar, Atbasar qalasynda № 2, 3, 5, 6, 7 orta mektepter jáne «Olimp» DSK, Balalardyń mýzyka mektebinde evakýatsiia pýnktteri uiymdastyrylǵan.
«Sý tasqynynan zardap shekken turǵyndarǵa zalal óteledi, ol úshin komissiia qurylyp, zardap shekken úilerdi dereý tekseretin bolady. Meniń basshylyǵymmen aýdan ákimdigi janyndaǵy sý tasqynyna qarsy shtab uiymdastyryldy», - dep túiindedi Amanbek Qaljanov.
Aqmola oblysy TJD baspasóz qyzmetiniń málimetinshe, qazirgi kezde barlyq eskertý júieleri dereý iske qosyldy. Turǵyndardy evakýatsiialaý, sondai-aq obektiler men turǵyn úilerdi qorǵaý boiynsha is-sharalar júrgizilip jatyr.
Sonymen birge, sý kirgen aimaqtarda motopompalardyń kómegimen sý sorý jumystary qolǵa alynǵan. Oǵan Azamattyq qorǵaýdyń memlekettik júiesinen 400-den astam adam jáne 100 tehnikasy jumyldyrylǵan.
Aita ketsek, budan buryn Atbasarda taǵy 123 adam evakýatsiialanǵan edi.
