Qazaq ulttyq qyzdar pedagogikalyq ýniversitetiniń PhD doktory, aǵa oqytýshy Aijan Qońyrovanyń jetekshiligimen stýdentter toby tarih sabaqtarynda interaktivti tsifrlyq kartalar men jasandy intellekt tehnologiialaryn tiimdi qoldanýǵa baǵyttalǵan «TarikhMap» innovatsiialyq platformasyn ázirledi, dep habarlaidy ult.kz.
«TarikhMap» platformasynyń negizgi maqsaty – tarih pánin oqytýdy tsifrlandyrý, bilim alýshylardyń pánge degen qyzyǵýshylyǵyn arttyrý jáne pedagogterdiń ýaqytyn tiimdi uiymdastyrýǵa múmkindik jasaý.
Búginde ýniversitet stýdentteri pedagogikalyq praktika barysynda atalǵan tsifrlyq júieni belsendi paidalanyp, jańa taqyryptardy túsindirýde, memleketterdiń aýmaqtyq ózgeristerin tanystyrýda jáne tarihi oqiǵalardyń ótken oryndaryn interaktivti formatta kórsetýde qoldanyp keledi. Bul óz kezeginde oqýshylardyń kórneki qabyldaýyn kúsheitip, aqparatty este saqtaý qabiletin arttyrýǵa yqpal etedi.
Sonymen qatar tsifrlyq kartalardyń múmkindikteri oqý baǵdarlamasy materialdaryn bekitýge, úi tapsyrmalaryn tekserýge jáne joǵary synyp oqýshylaryn ulttyq biryńǵai testileýge (UBT) daiarlaý úderisinde joǵary tiimdilik tanytyp otyr.
Joba pedagogikalyq baǵyttaǵy stýdentter men muǵalimderdiń sapaly tsifrlyq bilim berý kontentine qol jetkizý máselesin sheship qana qoimai, bolashaq mamandardyń aqparattyq tehnologiialar salasyndaǵy quzyretterin damytýǵa jáne olardyń kásibi ári kásipkerlik áleýetin arttyrýǵa múmkindik beretin zamanaýi bilim berý quraly retinde erekshelenedi.
Atalǵan platforma «Startup-Tomiris» baiqaýynda úzdikter qatarynan kórinip, 1 mln teńge kólemindegi qarjylai grantqa ie boldy. Qazirgi tańda platforma Almaty qalasy men Almaty oblysyndaǵy birqatar mektepterdiń oqý úderisine kezeń-kezeńimen engizilip keledi.
