Elordada kolledj stýdentin zorlamaq bolǵan kúdiktini der kezinde ustap, erlik kórsetken astanalyq Liýbov Shaýhalova marapattaldy, dep habarlaidy "Ult aqparat".
«Sizdiń negizgi mindetińiz balalarǵa tikelei qatysy bolmasa da, mekteppen onyń kórkeiýi jolyndaǵy eńbegińiz zor. Sizdiń jasaǵan erlik mektep oqýshylary úshin, jalpy barlyq adamdar úshin úlgi bolyp tabylady. Onyń ústine siz - áiel adamsyz, sondyqtan da siz eki ese úlken erlik jasadyńyz. Aldaǵy ýaqytta osy sekildi oqys oqiǵalar qaitalanbaýy úshin tiisti sharalar qabyldaityn bolamyz. Mektep basshylarymen jiyn ótkizip, mekteptegi kúzetti kúsheitý máselesi qolǵa alynady», - dedi qalalyq Bilim basqarmasynyń basshysy Ánýar Janǵozin marapattaý sátinde.
Óz kezeginde, erlik jasaǵan elordalyq turǵyn kez kelgen adamnyń ondai oqiǵaǵa bei-jai qaramaityndyǵyn aitty.
«Meniń ornymda bolǵan kez kelgen adam solai jasar edi. Men tek oqiǵany erterek baiqap qaldym. Tipti sharbaqtan qalai sekirip ótkenimdi bilmei qaldym. Onyń ústine bizdiń mekteptiń aýlasynda oryn alyp jatty, árine men kórip turyp bei-jai qarai almadym», - dedi Liýbov Shaýhalova.
Ol oqiǵa bolǵan mańdaǵy mektep sharýashylyq bólimde isteidi.
Aita ketsek, keshe Nur-Sultan qalalyq politsiia departamentiniń Jedel basqarý ortalyǵyna belgisiz er adamnyń 17 jastaǵy kolledj stýdentin zorlamaq bolǵandyǵy týraly habarlama túsken.
«Istiń mán-jaiyn anyqtaý barysynda zardap shegýshiniń shamamen saǵat 09:45-de inisin alyp ketý úshin mektepke bara jatqany anyqtaldy. Jolda oǵan mas kúidegi belgisiz erkek jolyqqan. Kúdikti qyzdyń betinen uryp, tasalaý jerge súirei bastaǵan. Qarsylyq tanytqan qyz kómekke adamdardy shaqyrǵan. Nátijesinde qyz sytylyp shyqqan», - dep habarlady atalǵan vedomstvo.
