Búgin Halyqaralyq Olimpiada komiteti Tokio-2020 Olimpiadasyna barlyq múddeli taraptarmen konsýltatsiialar júrgizýdi jalǵastyrdy, dep habarlaidy QR Ulttyq olimpiada komitetiniń baspasóz qyzmeti.
«Alǵashqy konsýltatsiianyń biri Halyqaralyq jazǵy olimpiadalyq sport federatsiialarynyń qatysýymen ótti. Aldaǵy kúnderi Ulttyq Olimpiada komitetterimen, sportshylar ókilderimen, Halyqaralyq paralimpiada komitetimen, halyqaralyq federatsiialarmen jáne basqa da múddeli taraptarmen konsýltatsiialar ótedi. COVID-19 virýsyna qatysty jaǵdai Tokio-2020 Olimpiadasyna daiyndalýǵa áser etedi jáne kún saiyn ózgerip otyr. Halyqaralyq olimpiada komiteti atalǵan olimpiadanyń ótýin qalaidy. Olimpiada oiyndaryna tórt aidan astam ýaqyt bar ekenin eskersek, dál qazirgi ýaqytta birjaqty sheshim qabyldaýdyń qajeti joq», - delingen baspasóz habarlamasynda.
Habarlamada jazylǵandai, Halyqaralyq olimpiada komiteti álemdegi bilikterdiń koronavirýsqa qarsy qabyldaǵan sharalary onyń taralmaýyna yqpal etedi dep senedi.
«Tokio-2020 Olimpiadasyna daiyndalyp jatqan sportshylardyń densaýlyǵy men ál-aýqaty – bizdiń basty nazarymyzda. Qaýipsizdikti qamtamasyz etý jáne sportshylardyń, jattyqtyrýshylar men qoldaý komandalarynyń múddelerin qorǵaý úshin barlyq sharalar qoldanylady. Biz – olimpiadalyq qaýymdastyqpyz, qandai ýaqytta da bir-birimizdi qoldaimyz», - deidi HOK Prezidenti Tomas Bah.
