Alyp shaharymyzdyń Naýryzbai aýdanynda №188 mektep-gimnaziiasynyń jańa sport alańy ashyldy. Zaman talabyna sáikes jasalǵan sporttyq alań eki myńǵa jýyq oqýshyǵa arnaiy ázirlengen.
Qalalyq Bilim basqarmasynyń usynysymen, jergilikti biýdjetten qarajat bólingen bolatyn. Jalpy kólemi 3200 sharshy metrdi quraityn alańda shaǵyn fýtbol, voleibol jáne basketbol alańdarymen qatar, túrli jattyǵý qurylǵylary ornatylǵan. Sport alańynda oqýshylardyń basketbol, voleibol, fýtbol, toǵyzqumalaq, shahmat, ústel tennisi, besasyq, asyq atý, jeńil atletika jáne taǵy da basqa sport úiirmeleri tegin jumys jasaýda.
Sporttyq alańnyń ashylýyna aýdan ákimdigi, ata-analar, belgili sportshylar men ustazdar qatysty. Balalardyń salaýatty ómir saltyn ustaýǵa septigin tigizetin alań bolaryna qonaqtar senim bildirdi. Osy oraida, Naýryzbai aýdany ákiminiń orynbasary Miras Nysanaliev oqýshylardy quttyqtap, olardan úlken úmit kútetinin atap ótti.
«Bul mektep aýdanymyzdaǵy eń kieli bilim ordalarynyń biri. Osy jerden qanshama bilimdi de, talantty jastarymyzdyń shyǵaryna senimdimiz. Barlyǵymyz biletindei, sport – densaýlyq kepili. Bolashaqta densaýlyǵy myqty urpaq qalasaq, dál osyndai sporttyq alańdar arqyly kóńil bólgenimiz jón bolar», – dedi M.Nysanaliev.
Ata-analar tarapynan da rizashylyǵyn bildirgenderdiń qarasy kóp boldy. Aldaǵy ýaqytta, balalaryn mekteptegi tegin úiirmege beretinderin aitty. Belgili aqyn Aqberen Elgezektiń qyzy da dál osy mektepte bilim alady eken. Ol da óziniń jyly lebizin bildirip, óz pikirimen bólisken bolatyn.
«Bul mektepti men qatty jaqsy kóremin. Sebebi, meniń qyzym da osy mektepti unatady. Óte úlken, ári ádemi sporttyq alań ashylyp otyr eken. Endigi jerde mektepte salaýatty ómir saltyn ustanatyn oqýshylar kóbeieri anyq. Bolashaqta dál osy mektepten, dál osy alańda ótetin sporttyq úiirmelerdiń arqasynda chempiondarymyz shyǵyp qalary anyq. Balalardyń arasynda sportty nasihattaý, olardy sportqa baýlý óte mańyzdy», – dedi aqyn A.Elgezek.
Al oqýshylardyń qýanyshynda shek joq. Endi olar, ózderine unaityn sport túrlerimen jańa alańda shuǵyldana alady. Tipti qalasa tegin úiirmelerge qatysyp, ýaqyttaryn tiimdi paidalana alady.
– Mektebimizde buryn-sońdy mundai úlken sporttyq alań bolǵan emes. Oqýshylardyń bári dán riza. Sebebi, qalaǵan sport túrlerimen ainalysa alady. Tipti, aralarynda bolashaq álem chempiony bolamyn dep otyrǵandar da az emes. Osyndai sporttyq alań salyp bergeni úshin bárine alǵysymdy aitamyn, – dedi mektep túlegi Alimnur Qadyrbai.
