Ákimshilik jáne sotqa deiingi is júrgizý elektrondyq formatqa aýystyrylady. Bul týraly QR Ishki ister ministrliginiń resmi ókili Nurdildá Oraz aitty, dep habarlaidy QazAqparat.
Aita keteiik, Ishki ister ministri Erlan Turǵymbaev vedomstvonyń qurylymdyq jáne aýmaqtyq bólimsheleriniń basshylarymen beinekonferentsbailanys rejiminde jedel keńes ótkizdi, onda Prezident Qasym-Jomart Toqaevtyń Qazaqstan halqyna Joldaýyn sapaly jáne ýaqtyly iske asyrý úshin birqatar mindetterdi belgiledi.
«Jedel keńeste atap ótilgendei, azamattardyń qaýipsizdigin qamtamasyz etý jáne memlekettik qyzmetterdi alý rásimderin jeńildetý boiynsha politsiia qyzmetiniń tiimdiligin arttyrý úshin tsifrlandyrý jobalaryn jedel iske asyrýdy qamtamasyz etý qajet. Búginde memlekettik qyzmetterdiń 95%-y elektrondy formatta usynylady, nátijesinde halyqpen tikelei bailanys barynsha azaitylyp, ákimshilik jáne sybailas jemqorlyq táýekelderi joiylady. Budan basqa, ákimshilik jáne sotqa deiingi is júrgizý elektrondyq formatqa aýystyrylady. Azamattardyń zańdy quqyqtary men múddelerin tolyq jáne tiimdi iske asyrý úshin qylmystyq protsestiń úsh býyndy modeline kóshý máselesi erekshe baqylaýda tur», - dedi N. Oraz aptalyq onlain brifingide.
Onyń atýynsha, keńeste adam quqyqtaryn qorǵaý, onyń ishinde qylmystyq-atqarý júiesi mekemelerinde jumys IIM-niń turaqty baqylaýynda ekeni atap ótildi.
«Sottalǵandardyń quqyqtyq jaǵdaiy jaqsarýda, olardyń áleýmettik beiimdelýi úshin jaǵdailar jaqsarýda, meditsinalyq qyzmet kórsetý azamattyq densaýlyq saqtaý organdaryna berildi. Ministr keńes barysynda memlekettik organdar qyzmetiniń tiimdiligin baǵalaýdyń negizgi kriteriii – bul, eń aldymen, azamattardyń senimi ekenin erekshe atap ótti. Sondyqtan ishki ister organdaryndaǵy sybailas jemqorlyq, tártip pen zańdylyqty buzý faktilerin joiý boiynsha qajetti sharalardy qabyldaý basty mindetterdiń biri bolyp sanalady. Qazir júrgizilip jatqan reformalar aiasynda negizgi mindetterdiń biri - qazaqstandyq politseidiń jańa beinesin qalyptastyrý bolyp otyr. Kóp jaǵdaida ony júzege asyrý vedomstvolyq oqý oryndarynyń nátijelerine bailanysty. Osyǵan bailanysty vedomstvo bilim berý protsesiniń sapasyna jáne kásibi kadrlardy daiarlaýǵa nazar aýdarady. Bul faktor qazaqstandyq politseidiń jańa kelbetin qalyptastyrýda sheshýshi ról atqarady», - dedi resmi ókil.
