Almaty oblysynda jeke sot oryndaýshylaryna qatysty tekserý kezinde tosyn derek anyqtaldy. 20 jeke sot oryndaýshysy býkmekerlik keńselerde qumar oiyndarǵa turaqty qatysyp, oiyn shottaryna jalpy 180 mln teńgege jýyq qarajat aýdarǵan, dep habarlaidy ult.kz.
Tekserý barysynda keibiriniń býkmekerlik shottaryn júieli túrde tolyqtyryp otyrǵany belgili bolǵan.
Máselen, jeke sot oryndaýshylarynyń biri úsh jyl ishinde qumar oiyndarǵa arnalǵan shotyna 139 mln teńge aýdarǵan. Taǵy bir maman osy maqsatqa 26 mln teńge jumsaǵan.
Almaty oblysynyń prokýratýrasy mundai áreket kásibi ádep talaptaryna qaishy keletinin atap ótti. Sebebi jeke sot oryndaýshylary azamattar men uiymdardyń múliktik quqyqtaryna qatysty mańyzdy mindetterdi atqarady.
«Mańyzdy fýnktsiialardy júzege asyratyn tulǵalardyń osyndai kólemdegi qarajatpen qumar oiyndarǵa qatysýy kásibi ádep qaǵidattaryna qaishy keledi jáne qoǵamnyń jeke sot oryndaýshylary institýtyna degen senimine keri áser etedi», – dep habarlady prokýratýra.
Anyqtalǵan faktiler boiynsha prokýrorlyq qadaǵalaý aktileri Almaty oblysynyń Ádilet departamenti men Jeke sot oryndaýshylarynyń óńirlik palatasyna joldandy.
Quzyrly organdar aldynda zańnamaǵa sáikes tiisti sharalar qabyldaý máselesi kóterildi.
