1 qazanda Pavlodar qalasy №2 sotynda Aron Atabekke qatysty onyń naýqastanýyna bailanysty bas bostandyǵynan aiyrý jazasynyń ótelmegen bóligin neǵurlym jeńil jazanyń túrine aýystyrý týraly usynysy qaraldy, - dep habarlaidy Pavlodar oblystyq soty.
Sottalýshy "Omyrtqanyń moiyn bóligi omyrtqaaralyq diskisiniń mielopatiiasymen zaqymdalýy, julynnyń moiyn bólimi deńgeiindegi degenerativti - demielinizirleýshi aýrýy" jáne taǵy basqa emdelmeitin aýrýmen aýyratyny anyqtalǵan.
Aýrýdyń bul túri QR Ishki ister ministriniń 2014 jylǵy 19 tamyzdaǵy №530 buiryǵymen bekitilgen naýqastanýyna bailanysty jazasyn óteýden bosatýdyń negizi bolyp tabylatyn sottalǵandardyń aýrýlar tizbesine kiredi.
Sot sheshimi boiynsha, Zań talaptaryna sáikes, (QK-tiń 75 babynyń 2 bóligi), ómir boiyna bas bostandyǵynan aiyrýdan basqa, jazany óteýge kedergi jasaityn aýyr naýqastan zardap shegýshi adamdy sot jazany óteýden bosatady nemese naýqasynyń sipaty, jasalǵan qylmystyq quqyq buzýshylyqtyń aýyrlyǵy, sottalǵan adamnyń jeke basy jáne basqa da mán-jailar eskerile otyryp, jaza neǵurlym jeńil jaza túrimen aýystyrylýy múmkin.
Zańda baiandalǵan mán-jailar men protseske qatysýshylardyń pikirin eskerip, sottalǵan tulǵaǵa bostandyǵyn shekteý jazasy 1 jyl merzimine probatsiialyq baqylaý ornatý men mindetterdi júkteýine aýystyryldy.
Sot sheshimimen kelispegen jaǵdaida sottalǵan tulǵa jáne protsestiń basqa qatysýshylary apelliatsiialyq sot satysyna shaǵym túsirýine quqyǵy bar.
Aron Atabek – aqyn ári dissident. 2014 jyldyń sáýirinen Pavlodarda jazasyn ótedi. Atabek bul jerge Qaraǵandy oblysy Qarajal qalasyndaǵy koloniiadan etappen jiberilgen. Ony eki ret Qostanai oblysy Arqalyq qalasyndaǵy "jabyq" túrmege salyp jazalaǵan.
Biyl 31 qańtarda Aron Atabek 68 jasqa toldy. Aqtóbede azamattyq belsendiler aqynnyń týǵan kúninde narazylyq aktsiiasyn ótkizip, bilikten ony bosatýdy talap etti.
