Biyl Soltústik Qazaqstan oblysynyń 115 aýylyn jańǵyrtýǵa 17 mlrd teńge jumsalady, dep habarlaidy QazAqparat.
Ortalyq kommýnikatsiialar qyzmetinde ótken baspasóz konferentsiiasynda Soltústik Qazaqstan oblysynyń ákimi Qumar Aqsaqalov aldaǵy bes jylda óńir aýyldaryn damytýǵa qomaqty qarajat bólinetinin jetkizdi.
«Ótken jylmen salystyrǵanda oblys qazynasy 25%-ǵa, iaǵni 323 mlrd teńgeden 406 mlrd teńgege deiin ósti. Jalpy 5 jyl ishinde bizdiń óńir 500 mlrd teńge kóleminde eleýli mólsherde qoldaýǵa ie bolady. Ol aqsha túrli salalarǵa jumsalady. Biraq maqsat jalǵyz – soltústikqazaqstandyqtardyń ómir súrý sapasyn arttyrý. Bul ásirese aýyl turǵyndarynyń turmys sapasyna qatysty. Óńirdiń 300 aýylyn jańartýǵa úlken qarajat jumsamaqpyz», - dedi óńir basshysy.
Qumar Aqsaqalovtyń aitýynsha, biyldyń ózinde 100-den astam aýylda meditsinalyq nysandar men joldar, injenerlik infraqurylym jóndeýden ótpek.
«Biyl 115 aýyldy jańǵyrtýǵa 17 mlrd teńgege jýyq qarajat bólindi. Aýyldarda mektepter, balabaqshalar, dárigerlik ambýlatoriialar, kentishilik joldar men sýmen jabdyqtaý jelileri kúrdeli jóndeýden ótedi», - dedi ákim.
