Estoniianyń Tallin qalasynda qazaqstandyq ánshi Dimash Qudaibergenniń qurmetine kóshet otyrǵyzylyp, janyna estelik belgi qoiyldy, dep habarlaidy dimashnews saity.
Gúldep turǵan tal Soltústik Eýropadaǵy ásem de tarihi saiabaqtardyń biri sanalatyn Kadriorg saiabaǵyndaǵy alleiada otyrǵyzyldy. Sharany qazaqstandyq ánshiniń Estoniiadaǵy «Dimash Estonian Dears» fan-klýby uiymdastyrdy.
Estoniialyq jankúierler 2018 jyly Dimashtyń Londondaǵy kontsertine barǵannan keiin, 2019 jyldyń naýryzynda «Dimash Estonian Dears» fan-klýbyn qurdy.
«Ánshiniń týǵan kúnine bir ai qalǵanda estoniialyq Dears Dimashqa qandai syilyq jasaý kerektigin oilastyra bastady. Olar syilyqtyń erekshe bolýyn ári ómir boiyna saqtalýyn qalady. Fan-klýbtyń negizin qalaýshylardyń biri Ýlle Krýýse tanymal tulǵalar esimderimen atalǵan alleiada ornalasqan áigili Kadriorg saiabaǵynda qyzmet etedi eken. Fan-klýb ákimshiligi kóp oilanbai, Dimashqa arnap tal otyrǵyzý kerek dep sheshken. Erekshe ári este qalarlyq syilyq», - delingen saitta.
Dimashtyń atyndaǵy tal sáýir aiynda otyrǵyzyldy. Al belgi ánshiniń týǵan kúni qarsańynda ornatyldy. Onda «Dimash Qudaibergen. Álemdegi eń tamasha daýys. Estoniialyq dostar 2020» dep jazylǵan.
Belginiń ashylýyna Qazaqstannyń Estoniiadaǵy elshisi Nurlan Seitimov qatysty.
Eske sala ketsek, 24 mamyrda Dimash 26 jasqa toldy. Álemniń birneshe elindegi jankúierler oǵan túrli quttyqtaýlar joldady.
Al qytailyq fanattar ánshiniń qurmetine shól dalaǵa 3 myń aǵash otyrǵyzdy.
Sonymen birge, Dimash Instagram paraqshasynda jankúierlerimen qaýyshyp, olardyń suraqtaryna jaýap berdi.
Budan bólek, onyń týǵan kúni qurmetine Dimash Manga (Manga D’R’S’) jańa resmi joba tanystyryldy. Manga D’R’S’ — bul erekshe jáne qyzyqty siýjeti bar japon komiksteri (manga) janryndaǵy shyǵarmalar tsikli. Komiksti álemniń 7 tilinde elektrondy nemese baspa túrinde arnaiy saittan satyp alýǵa bolady. Oqiǵa jelisi 2019 jyldyń 10 jeltoqsanynda Dimashtyń Niý-Iorktegi kontsertinen bastaý alady. Manga D’R’S’ shamamen 1 shildede satylymǵa shyǵa bastaidy.
