Foto: primeminister.kz
Premer-ministr Álihan Smaiylov memlekettik baǵdarlama boiynsha salynǵan turǵyn úilerge qatysty másele qozǵady. Úkimet otyrysynda ministrler men ákimderge qabyrǵasy túsip jatqan úiler men sapasyz joldardyń, sondai-aq sapa standarttaryna sáikes kelmeitin, toz-tozy shyqqan aýlalardyń sýreti kórsetildi, dep habarlaidy "Ult aqparat".
Otyrysta turǵyn úi-kommýnaldyq infraqurylymdy damytý máselesi qaraldy. Ministrdiń baiandamasynan keiin Úkimet basshysy sóz aldy.
"Memlekettik baǵdarlama boiynsha salynǵan turǵyn úilerdiń máselesine jeke toqtalǵym keledi. Memleket turǵyn úi qurylysyna úlken qarjy bólip otyr. Soǵan qaramastan, onyń sapasyna qatysty shaǵym óte kóp. Aýlalardyń fotosyn kórińizder. Mundai úilerdiń qai óńirde salynǵanyn aipai-aq qoiaiyn, biraq barlyq jerde osyndai kórinis! Ony ózderińiz de bilesizder. Balalardyń oiyn alańyna qarańyzdar! Joldardyń jaǵdaiy qandai?! Bul ne, qalypty normaǵa ainalǵan ba?", - dedi Smaiylov.
Premer-ministr ákimderge biýdjet qarjysyna salynǵan úilerge reviziia jasap, barlyq kemshilikti shuǵyl túrde joiýdy tapsyrdy. Sondai-aq ol turǵyn úi qurylysynyń sapasyn qatań baqylaýǵa alý qajettigin aitty.
«Búginde turǵyn úi-kommýnaldyq sharýashylyq salasynda shuǵyl ári sapaly sheshýdi qajet etetin másele kóp. Sonymen qatar jaýapty memlekettik organdardyń jumysynda da halyqtyń áleýmettik osal toptaryn turǵyn úimen qamtamasyz etýde kemshilikter bar.
Kezekte turǵandardy baspanamen qamtamasyz etý jumystarynyń sapasyz josparlanýyn da bólek alyp qaraýǵa bolady. Salynyp bitken turǵyn úilerin ala almai júrgen azamattardan shaǵymdar kóp túsip jatyr. Sebebi «Otbasy bankinde» jeńildikpen nesie berýge qajetti qarajat joq», - dedi Úkimet basshysy.
Premer-Ministr aitylǵandardy esepke ala otyryp, kezekte turǵandarǵa jaldaý aqysyn sýbsidiialaý jónindegi sharalardyń tiimdiligine qosymsha taldaý júrgizip, naqty usynystar engizýdi, sondai-aq kezekte turǵandardy turǵyn úimen qamtamasyz etý kezinde memlekettik qoldaýdyń barlyq baǵyttaryn ýaqytyly qarjylandyrýdy tapsyrdy.
Álihan Smaiylov óńirlerde qurylys maýsymyn ýaqytyly bastaý úshin tiisti jer ýchaskelerin aldyn ala bólý, jobalyq qujattamany ázirleý jáne qajetti infraqurylymdy júrgizý mańyzdy ekenin atap ótti.
