Soltústik Qazaqstan oblysynyń Sh.Ýálihanov aýdanyndaǵy Qýlykól aýyly qajetti is-sharalardyń nátijesinde tasqyn sýdan zardap shekken joq. Bul jaiynda óńir basshysy Qumar Aqsaqalov Feisbýktegi paraqshasynda jazdy, dep habarlaidy "Ult aqparat".
«Men úsh kúnnen beri oblysymyzdyń eń shetki núkteleriniń biri - Sh.Ýálihanov aýdanyndaǵy Qýlykól aýylynda júrmin. Petropavl qalasy men eldimekenniń ara qashyqtyǵy - 559 shaqyrym. Qaratal jáne Qýlykól aýyldarynda úshinshi kún jedel shtab jumys istep jatyr. Barlyq qyzmetter kúni-túni kezekshilik etýde. Sý aýylǵa kirmes úshin jaǵany bekittik. Nátijesinde, Qýlykól tasqyn sýdan zardap shekpeidi», - dep jazdy Qumar Aqsaqalov.
Oblys ákimi óz oqyrmandaryna tasqyn sý kelgen eldi mekenderdegi turǵyndardyń ómirine, densaýlyǵyna, mal-múlkine esh ziian kelmeýi úshin qajetti sharalardyń qolǵa alynǵanyn jetkizdi. Máselen, Qaratal aýylynyń turǵyndary der kezinde Qýlykóldegi evakýatsiialyq beketke kóshirildi.
Budan basqa Qumar Aqsaqalov aýyldarǵa sýdyń qaidan kelgenin aitty.
«Aqmola oblysynda ornalasqan Sileti sý qoimasynan ár sekýnd saiyn 574 tekshe metr sý jiberilip jatyr. Bul jyldaǵy kórsetkishten anaǵurlym joǵary. Úsh kúnniń ishinde osy eki aýylǵa Siletiden shamamen 154 mln tekshe metr sý keldi. Salystyrý úshin aitaiyn: osydan 4 jyl buryn barlyq sý tasqyny kezinde, iaǵni bir aidyń ishinde 330 mln tekshe metr sý kelgen bolatyn», - dep jazdy Qumar Aqsaqalov.
