Soltústik Qazaqstan oblysyna «Eńbek» nátijeli jumyspen qamtý baǵdarlamasy arqyly ońtústik óńirlerden kóship kelgen 140 otbasy turaqtamai qaita ketip qalǵan, dep habarlaidy "Ult aqparat".
«Eńbek» nátijeli jumyspen qamtý jáne kásipkerlikti damytý baǵdarlamasy arqyly SQO-ǵa sońǵy jyldary 2 myńnan astam otbasy qonys aýdarǵan. Alaida solardyń 140-y qaita kóship ketken.
«2020 jyldyń maýsymyna deiin kelisimshart boiynsha qonys aýdarýshylar óńirde 1 jyl turýy tiis. Endi bul merzim biyldan bastap 5 jylǵa uzartyldy. Osy merzimnen keiin ereje boiynsha azamattar otbasylyq jaǵdaiyna jáne aýa raiynyń jaqpaýyna bailanysty kóship kete alady. Munaida qarjy qaitarylmaidy. Basqa jaǵdaida erikti túrde memleket bergen sýbsidiialardy qaitarady», - deidi SQO jumyspen qamtýdy úilestirý jáne áleýmettik baǵdarlamalar basqarmasynyń basshysy Almaz Qoshmanov.
Ár qonys aýdarýshyǵa 70 AEK kóleminde sýbsidiia tólenedi. Baspana jaldaý úshin bir jyl boiy ai saiyn 87 myń teńge beriledi.
SQO ákiminiń keńesshisi Ábdiǵani Bázilhanulynyń aitýynsha, baǵdarlamany jetildiretin tustary kóp.
«Kóship kelgenderge memleketten jaqsy kómek bar. Alaida kelisimde kórsetilgen merzim aiaqtalǵan soń, olar ketip qalady. Jalpy bul – óte qajet baǵdarlama. Munda úlken saiasat jatyr. Qonys aýdarýshylar «aqsha alyp, jaǵdaiymdy jaqsartamyn» dep emes, «osy jerdiń iesi bolamyn, paidamdy tigizemin» degen uǵymmen kelýi kerek. Bir baiqaǵanym, kóbine jumysqa ornalasa almaǵandar ketip jatyr. Jalpy baǵdarlamanyń olqylyqtar kóp. Máselen úidi satyp alý quqyǵy bar, salý quqyǵy joq», - deidi Ábdiǵani Bázilhanuly.
