Soltústik Qazaqstan oblysynda KamAZ kóliginiń júrgizýshisi Mamliýtka jolynda bos turǵan politseilerdiń baqylaý beketin soqty, dep habarlaidy "Ult aqparat".
Áleýmettik jelidegi SQO-nyń jergilikti pablikterinde Mamliýtka tas jolynda jabyq turǵan politseilerdiń baqylaý beketine KamAZ kóliginiń soǵylǵan fotosýreti tarady.
Petropavl qalasy politsiia basqarmasy bul oqiǵaǵa qatysty túsinik berdi.
«23 shilde kúni saǵat tańǵy 06.00 shamasynda Maǵjan Jumabaev aýdanynyń 64 jastaǵy turǵyny KamaAZ kóligimen Mamliýt jolynda jabyq turǵan politseilerdiń «Zapadnyi» baqylaý beketin soqty. Er adam sút apara jatqan. Apat saldarynan ǵimarat zaqymdandy. Zardap shekkender joq. Júrgizýshi spirttik ishimdik ishpegen», - delingen habarlamada.
Politseilerdiń aitýynsha, osy oqiǵaǵa bailanysty KamAZ júrgizýshisine «Kólik quraldary júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen buzýshylyǵy» boiynsha ákimshilik hattama toltyryldy.
