Soltústik Qazaqstan oblysynda meditsinalyq uiymdarǵa monitoring júrgizilip, nátijesinde qyzmet kórsetýge qatysty 32 myńnan astam olqylyq anyqtaldy, - dep habarlaidy "Uli aqparat".
«Áleýmettik meditsinalyq saqtandyrý qory» KEAQ SQO boiynsha filialy meditsinalyq uiymdarǵa monitoring júrgizip, 5 aidyń qorytyndysyn shyǵardy. Nátijesinde meditsinalyq qyzmet kórsetýge qatysty 32 682 kemshilik anyqtaldy.
Baspasóz qyzmetiniń málimetinshe, oblys turǵyndaryna kórsetiletin meditsinalyq qyzmettiń sapasy men qoljetimdiligin arttyrý maqsatynda óńirdiń densaýlyq saqtaý uiymdarynyń jumysyna únemi monitoring júrgiziledi. Kemshin tustar bar. 5 aidyń qorytyndysy boiynsha eń kóp kemshilik ambýlatoriialyq-emhanalyq kómek kórsetetin uiymdar arasynda, atap aitqanda konsýltatsiialyq-diagnostikalyq qyzmetterge qatysty anyqtalǵan. Meditsinalyq kómektiń osy túri boiynsha 26 myńnan astam fakti tirkelgen. Al statsionarlyq jáne statsionardy almastyratyn kómek kórsetýge qatysty 4 myńnan artyq kemshilik anyqtaldy, olar boiynsha 368,8 mln teńge somasynda aiyppul salyndy.
«Jedel járdem qyzmetinde 186 jaǵdai tirkeldi. Bul – eń azy. Negizinen emdeý-diagnostikalyq is-sharalary standarttarynan aýytqý, meditsinalyq qujattamany sapasyz júrgizý, qyzmetter qunynyń negizsiz qymbattaýy jáne meditsinalyq qyzmet kórsetýdiń rastalmaǵan faktileri anyqtaldy», - deidi mamandar.
Sonymen qatar Qordyń SQO filialy sarapshylary is júzinde kórsetilmegen qyzmetterdiń 313 jaǵdaiyn, iaǵni qosyp jazýdy anyqtady. Bul jaǵdailardyń barlyǵy ambýlatoriialyq-emhanalyq kómekke qatysty. Aiyppul sanktsiialary qoldanyla otyra 1,2 mln teńgeden astam qarajat tólemnen alyndy, bul aqsha keiin meditsinalyq kómekti qarjylandyrýǵa jumsalady. Al júrgizilgen jumystyń nátijesi boiynsha aqparat densaýlyq saqtaý basqarmasyna tiisti shara qabyldaý úshin jiberildi.
