Soltústik Qazaqstan oblysynda 14 blokpost jumys istese, búginnen bastap sonyń 11-i jumysyn toqtatty, - dep habarlaidy SQO politsiia departamenti baspasóz qyzmeti.
Oblys aýmaǵynda ornalasqan 14 blokpostta 250-den astam tártip saqshysy, odan basqa meditsinalyq jáne veterinarlyq qyzmettiń mamandary jumys istedi. Eki aiǵa jýyq ýaqyt boiy aldyńǵy shepte tynbai qyzmet atqarǵan politseiler men meditsina qyzmetkerlerin Politsiia departamentiniń basshylyǵy quttyqtady.
«Búgin otbasylaryńyzǵa oralyp, ata-analaryńyzben, bala-shaǵamen qaýyshasyzdar. Sizderdiń týǵan-týystaryńyzǵa udaiy qoldaý bildirip, túsinistik tanytqany úshin alǵysym sheksiz. Ortaq kúsh-jigermen aldaǵy ýaqytta da el azamattarynyń qaýipsizdigi men densaýlyǵy úshin birge jumys isteimiz dep senemin», - dedi tártip saqshylary men medikterge alǵys hat tapsyrǵan oblystyń bas politseii Marat Tólebaev.
Reseimen shekaralas Mamliýt, Ýálihanov jáne Maǵjan Jumabaev aýdandarynda ornalasqan úsh blokpost shekara ashylǵanǵa deiin jumystaryn jalǵastyrady. Basqa beketterdegi qyzmetkerlerdi Politsiia departamenti bastyǵynyń orynbasarlary men aýdandyq bólinisterdiń bastyqtary quttyqtady. Aiyrtaý aýdanyndaǵy Antonovka aýylyna politsiia departamenti bastyǵynyń birinshi orynbasary Qanat Aitbaev bardy. Ol barlyq qyzmetkerlerge adal qyzmetteri úshin rizashylyǵyn bildirip, alǵys hattar tabystady.
Politseiler men meditsina qyzmetkerleriniń aitýlarynsha, osy kúndi ásirese olardyń týystary asyǵa kútken. Munyń májbúrli shara ekenin barlyǵy jaqsy túsinedi. Mamandar óz jumysyn abyroimen atqaryp shyqty jáne qoiylǵan shekteýler jaǵdaidy jaqsartýǵa septigin tigizgenine senimdi.
«Árine, turǵyndarǵa da alǵys aitamyz. Túrli jaǵdailar boldy, negizinen adamdar ońai emesin túsinip, bizge qoldaý kórsetip jatty», - deidi Aiyrtaý aýdanynyń aýmaǵynda qyzmet atqaratyn SQO PD patrýldik politsiia batalony qyzmetiniń inspektory Ashat Baqytjanov.
Úiinde ony jary men úsh kishkentai búldirshini taǵatsyzdana kútti, balalardyń merekesinde ákeleriniń úige oralýy olar úshin úlken syi boldy.
