Soltústik Qazaqstan oblysynda qus tumaýynyń taralýyna jol bermeý úshin aýrý oshaǵyndaǵy barlyq qus joiylmaq, al onyń ielerine ótemaqy tólenetin boldy, dep habarlaidy QazAqparat.
SQO-da qus tumaýynyń tirkelýine bailanysty respýblikalyq komissiia keldi. QR AShM veterinarlyq baqylaý jáne qadaǵalaý komiteti tóraǵasynyń mindetin atqarýshy Baýyrjan Abyzbaev basqarǵan jumys toby aýrý oshaǵy – M.Jumabaev aýdany Lebiaje eldi mekeninde boldy. Qus tumaýynyń taralýyna jol bermeý maqsatynda atqarylyp jatqan sharalarmen tanysyp, turǵyndar arasynda túsindirý jumystaryn júrgizdi. Bul jaiynda SQO veterinariia basqarmasynyń basshysy Berik Áljanov áleýmettik jelidegi paraqshasynda habarlady.
«Infektsiia oshaǵyn oqshaýlaý jáne joiý maqsatynda eldi meken ainalasy jyrtyldy. Aýylǵa kireberiske kelip-ketýshi kólikke dezinfektsiialyq kedergi qoiyldy. Epizootiialyq tizbekti úzý maqsatynda aýrý oshaǵyndaǵy barlyq qusty joiý týraly sheshim qabyldandy. Qus ielerine tolyq mólsherde ótemaqy tólenedi», - dep jazdy Berik Áljanov.
Basqarma basshysynyń aitýynsha, epizootiialyq jaǵdai baqylaýǵa alynǵan. Oblystyń basqa eldi mekenderine qaýipti infektsiia taralmaýy úshin barlyq tiisti is-sharalar – vaktsinatsiia, turǵyndar arasynda túsindirý jumystary júrgizildi, qus pen qus ónimderi baqylaýǵa alyndy.
