Soltústik Qazaqstan oblysynda Quleke batyrdyń urpaǵy atadan balaǵa miras bolǵan qundy jádigerler – batyrdyń naizasynyń ushyn jáne tuǵyryq pen tomaǵany, Mekkeden ákelingen kóne sandyqty syiǵa tartty, dep habarlaidy "Ult aqparat".
Quleke batyrdyń kózindei bolǵan naizanyń ushyn onyń urpaǵy osy kúnge deiin atadan balaǵa miras etip berip kelgen eken. Úsh ǵasyrǵa jýyq tarihy bar jádiger jaqsy saqtalǵan. Ony batyrdyń altynshy urpaǵy Qoshan Jantileýovtiń uly Murat «Abylai han rezidentsiiasy» mýzei keshenine syiǵa tartty.
«Bul, árine, qundy jádiger. Bul qarýmen batyr jońǵarlar men shúrshitterge qarsy soǵysqan deidi. Budan basqa Murat Jantileýov tomaǵa men qus otyrǵyzatyn tuǵyryqty jáne Mekkeden ákelingen kóne sandyqty syiǵa tartty. Jádigerlerdi zerttep, kórermen nazaryna usynamyz», - deidi «Abylai han rezidentsiiasy» mýzei kesheni tarihi-ǵylymi zertteý bóliminiń meńgerýshisi Baýyrjan Júnisov.
Quleke batyr Qyzyljar óńiriniń týmasy. Ataqty Shal aqynnyń ákesi. Abylaidyń aitýymen balasy Shal aqyn Quleke batyrdy Túrkistanǵa aparyp, Qoja Ahmet Iassaýidiń janyna, mavzoleige jerlegen eken.
«Abylaidyń qos batyry – Quleke men Qulsary. Quleke jaiynda sońǵy kezde epistoliarlyq jazba arqyly biraz qundy málimet tabylyp jatyr. Tanymal zertteýshi, tarihshy Sh.Ýálihanov atyndaǵy tarih jáne etnologiia institýtynyń qyzmetkeri Irina Erofeeva osyndai qujattar arqyly onyń naqty qaitys bolǵan jylyn anyqtady. Osylaisha onyń týǵan jylyn da bildik. Buǵan deiin 1710 jyly dúniege kelip, 1771 jyly qaitty dep keldik. Durysy 1763 jyly qaitqan eken. Bul jaiynda Abylaidyń Reseidiń sol kezdegi patshaiymy Ekaterina II Alekseevnaǵa 1764 jyly jazǵan hatynan belgili boldy. Onda qazaq hany imperator áieldi taqqa otyrýymen quttyqtap, oǵan tanys adamdardyń ishinde Qulekeniń bir jyl buryn dúnieden ótkenin habarlaǵan. Iaǵni 1763 jyly. Al Shal aqyn óz óleńderinde ákesi Qulekeniń múshel jasqa kelip qaitqanyn talai jazǵan. Sondyqtan ol barlyq aqparatta kórsetilgendei 1710 jyly emes, 1702 jyly dúniege kelgen», - deidi Baýyrjan Júnisov.
Quleke batyr elshi, ári mámileger bolǵan. Birneshe shet tilin jetik meńgergen bilimdi, asa kórnekti jaýynger.
«1742 jyly Orynbor qalasynda qazaqtyń 148 bi-batyry Reseige adal qyzmet etýge ant bergen. Solardyń ishinde Quleke batyr da bolǵan. Ol 35-inshi bolyp qol qoiǵan eken. Onymen birge Qarasai, Baian batyrlar da ant bergen. Elimizdiń soltústigin jaýdan qorǵaǵan. Epistoliarlyq jazbalarda batyrdyń qol astynda 3 myńnan artyq shańyraǵy bolǵan delingen. Resei patshalary onyń qyzmetin joǵary baǵalap, jalaqy tólep turǵan», - deidi mýzeidiń bólim meńgerýshisi.
