Soltústik Qazaqstan oblysynda biyl it pen mysyq asyraý jáne serýendetý qaǵidalaryn buzǵany úshin 76 turǵyn ákimshilik jaýapkershilikke tartyldy, dep habarlaidy QazAqparat.
SQO Politsiia departamenti baspasóz qyzmetiniń málimetinshe, Petropavl qalasynda Mádeniet jáne demalys saiabaǵynda itterdi serýendetýge alań bólingen. Sondai-aq, kóp qabatty úilerdiń turǵyndary jalpy jinalystarda úidiń ainalasynan it pen mysyqty serýendetýge arnaiy oryn bólýge quqyly.
«Soltústik Qazaqstan oblysy máslihatynyń 2015 jylǵy 21 qańtardaǵy sheshimimen it pen mysyqty asyraý jáne serýendetý erejesi bekitildi. Osy erejege sáikes úi janýarlaryn aýlalarda, balalar alańdarynda, mektepke deiingi mekemelerdiń telimderinde, mektep alańdarynda, emdeý-profilaktikalyq jáne meditsinalyq densaýlyq saqtaý mekemeleriniń aýmaqtarynda, stadiondarda, saiabaqtarda, skverlerde serýendetýge bolmaidy.
Eger de janýarlar kireberisterde, baspaldaq alańdarynda, sporttyq, balalar alańdarynda, gazondarda, trotýarlarda, saiabaq jáne skverler aýmaqtarynda ekskrementterin qaldyrsa, ony ieleri dereý jinaý qajettigin esten shyǵarmaǵan jón. Itterdiń dekorativti túrlerinen basqalaryn tumyldyryqpen serýendetý qajet», - deidi Jergilikti politsiia qyzmeti basqarmasynyń aǵa inspektory Aleksandr Rozbah.
QR Ákimshilik quqyq buzýshylyq týraly kodeksiniń 408-babyna sáikes it pen mysyqty asyraý jáne serýendetý qaǵidalaryn buzǵandarǵa úsh ailyq eseptik kórsetkish mólsherinde aiyppul salynady. Bul - 7 myń teńge shamasynda.
Jalpy jyl basynan osyndai quqyq buzýshylyq úshin soltústik qazaqstandyqtar 500 myńnan asa teńge aiyppul tóledi.
