Soltústik Qazaqstan oblysynda eki aýyldy sý basý qaýpi bar, dep xabarlaidy "Ult aqparat".
QR IIM Tótenshe jaǵdailar komiteti tóraǵasynyń orynbasary Marat Kúldikovtyń aitýynsha, Sileti qoimasynan sýdy kóptep jiberilýine bailanysty Soltústik Qazaqstanda Qaratal men Quldykól aýyldaryn sý basýy múmkin. Qazirgi kezde Sileti sý qoimasy 95 protsentke tolyp tur. Sol sebepti sýdy jiberip turýǵa týra kelip otyr.
«Búgin kúndiz saǵat 12:00-den bastap biz Qarataldyń turǵyndaryn aldyn ala qaýipsiz jerge kóshire bastadyq. Osy ýaqytqa deiin tikushaqpen 33 adam evakýatsiialandy. Sosyn týǵan-týystardyń úiine jáne mekteptegi arnaiy evakýatsiialyq beketke kóship jatqandar da bar. Budan bólek, 2 754 bas maldy qaýipsiz jerge aidap tastady», - dedi M.Kúldikov Astanadaǵy shuǵyl baspasóz máslixatynda.
Onyń aitýynsha, Qaratal aýylynda 233 adam turady. Biraq barlyǵyna sý basý qaýpi tónip turǵan joq. Sol sebepti tek sý basý qaýpi bar turǵyndar ǵana qaýipsiz jerge kóshiriledi. Al Quldykól aýlynda shetki úilerdi sý basýy ábden múmkin.
Oblys ákimi Qumar Aqsaqalov qaýip tóngen aimaqqa jetip, jaǵdaidy baqylaýǵa aldy.
«Oblystyń shalǵai eldi mekenderi bolǵandyqtan jetý qiyn boldy. Qazir ol jerde traktor, býldozer, ekskavator - barlyǵy 25 tehnika jumys istep jatyr. Kómekke ózderiniń kerek-jaraqtarymen qutqarýshylar keldi», - deidi SQO Tótenshe jaǵdai departamentiniń bastyǵy Ramil Kamalov.
Al, Ýálihanov aýdanyndaǵy Bereke aýylynda erigen qar sýy 200 adamdy elektr qýatynsyz qaldyrdy. Elektr baǵandary aǵyn sýǵa shydas bermei qulaǵan. Sý deńgeii túsisimen-aq qutqarýshylar qalypqa keltirý jumystaryn bastaidy.
Sondai-aq, Soltústik Qazaqstanda oblystyq jáne aýdandyq mańyzy bar joldardyń jeti tusyn sý shaiyp ketken.
Sh.Ýálihanov, Aqjar jáne Taiynsha aýdandarynda eldi mekenderdi jalǵaityn joldardy sý basty. Qazir bul jerlerde arnaiy tehnikalar jumys istep jatyr. Beketter ornatylyp, kólikter ainalma joldarmen júrýge májbúr.
