Soltústik Qazaqstan oblysy Beskól aýylynda 3-4 kún ishinde 100-den astam turǵyn dáriger kómegine júgingen. Barlyǵynda aýrý belgileri birdei, dep habarlaidy "Ult aqparat".
Beskól aýyly turǵyndarynyń aitýynsha, aýyryp jatqandar kóp. Keibiri ózdiginen emdelip jatyr. Aýrý belgileri astan ýlanýǵa uqsas. Dene qyzýy kóteriledi, álsirep, qusady.
Nurlan Áskendirovtiń qazir eki balasy aýrýhanada jatyr.
«Balalardyń nemen aýyryp jatqanyn bilmeimin. Úide qyzym ekeýimiz qalǵan edik, endi qyzym da aýyryp qaldy. Jaǵdaiy nasharlasa jedel járdem qyzmetin shaqyramyn», - deidi Beskól turǵyny.
Turǵyndar «bar pále – sapasyz sýdan» deidi. Sanitariialyq-epidemiologiialyq baqylaý basqarmasynyń mamandary aýyz sýdyń synamasyn aldy. Alaida ázirge nátijesi daiyn emes.
«28 mamyrdan aýdandyq aýrýhanaǵa qusý, diareia, dene qyzýynyń kóterilýine shaǵymdanǵan adamdar kóbeidi. Dárigerler 78 bala men 36 eresek adamdy qabyldady. Olarǵa enterovirýstyq infektsiia diagnozy qoiyldy. 10 naýqas aýrýhanaǵa jatqyzyldy. Aýdanda shuǵyl túrde provizorlyq oryndar ashyldy», - deidi Qyzyljar aýdandyq aýrýhana bas dárigeriniń mindetin atqarýshy Janar Kákimova.
Beskól aýylynda turǵyndardyń jappai aýyrýyna qatysty oblystyq prokýratýra qylmystyq is qozǵady. Osy derekke qatysty arnaiy jumys toby qurylyp, istiń mán-jaiy anyqtalyp jatyr.
