Foto: Akorda.kz
Qasym-Jomart Toqaevtyń atyna Naýryz merekesine orai shet memleketterdiń basshylarynan quttyqtaýlar kelip túsip jatyr, dep habarlaidy "Ult aqparat" Aqordanyń baspasóz qyzmetine silteme jasap.
Qytai Halyq Respýblikasynyń Tóraǵasy Si Tszinpin el Úkimeti men halqynyń, sondai-aq óziniń atynan joldaǵan quttyqtaý jedelhatynda dostas Qazaqstan halqyna baq-bereke, al Qasym-Jomart Toqaevqa zor densaýlyq jáne onyń jaýapty jumysyna tabys tiledi.
– Men Qytai jáne Qazaqstan arasyndaǵy qarym-qatynastyń damýyna airyqsha mán beremin. Sizdiń Qytaiǵa memlekettik saparmen keletinińizge jáne biyl mamyr aiynda ótetin alǵashqy «Qytai – Ortalyq Aziia» sammitine qatysatynyńyzǵa qýanyshtymyn. Eki eldiń yntymaqtastyǵyn odan ári damytý, sondai-aq Qytai men Ortalyq Aziia arasyndaǵy bailanysty nyǵaitý máseleleri jóninde ózińizben pikir almasamyz dep senemin, – dep jazylǵan Si Tszinpinniń jedelhatynda.
AQSh Prezidenti Djo Baiden Qasym-Jomart Toqaevty jáne Qazaqstan halqyn Naýryz meiramymen jáne Ramazan aiynyń bastalýymen quttyqtady.
– Elderimizdiń arasyndaǵy ózara strategiialyq seriktestik pen halyqtarymyzdyń dostyq qarym-qatynasy búkil aimaqtaǵy beibitshilikti saqtaýǵa jáne óńirdi órkendetýge septigin tigizedi. Búgin Astanadan Almatyǵa deiingi jáne búkil el turǵyndary kóktemgi jańarý merekesin toilaidy. Qazaqstannyń jarqyn bolashaǵyn jáne elde teń quqyqtar men múmkindikterdi qamtamasyz etetin Sizdiń saiasi jáne ekonomikalyq reformalaryńyzdy Amerika Qurama Shtattary árdaiym qoldaitynyn rastaimyn. Naýryz qutty bolsyn! Ulys oń bolsyn! – dep jazǵan Djo Baiden.
