Qytaidyń Shyńjań Uiǵyr avtonomiialy aýdanynyń (ShUAR) Boro-Tala-Mońǵol avtonomiialyq óńiriniń biligi bir táýlik ishinde 500 myń jergilikti turǵyndy koronavirýsqa tekserdi.
Bul týraly ótken dúisenbide jergilikti densaýlyq saqtaý komitetiniń basshysy Sýn Tao málim etti, dep habarlaidy "Ult aqparat".
Bir táýlik ishinde Qytaidyń soltústik-batysyndaǵy ShUAR-dyń Boro-Tala-Mońǵol avtonomiialyq aimaǵy turǵyndarynyń barlyǵy derlik koronavirýsqa test tapsyrdy. Ondaǵy halyq sany – shamamen 500 myń. Aimaq biligi ótken jeksenbi kúni Alashańqai qalasynda standartty nýklein qyshqylyn tekserý kezinde úsh adamnyń koronavirýspen simptomsyz aýyryp júrgenin anyqtady, artynsha jappai testileý ótkiziletini týraly málimdedi. Sol kúni virýspen simptomsyz aýyryp júrgen úsh adam men olarmen tyǵyz bailanysta bolǵan 88 adam karantinge jabyldy.
Aimaqtyń densaýlyq saqtaý jónindegi komitetiniń málimdemesine sáikes, 16 tamyz saǵat 08:00-degi jaǵdai boiynsha, testileý nátijeleriniń bári teris bolyp shyqqan. Barlyǵy 498 myń adamnan synamalar alyndy, olardyń qatarynda Alashańqai qalasynyń 15 myńnan asa turǵyny bar. Qazirgi kezde Alanshankoýda COVID-19-ǵa testileýdiń ekinshi raýndy bastaldy.
Alashańqai qalasynda úsh simptomsyz tasymaldaýshy anyqtalǵannan keiin jeksenbiden bastap karantin sharalary kúsheitildi. BAQ-tyń habarlaýynsha, «Alashańqai qalasynyń negizgi aýdandaryn jabyq túrde basqarý engizilgen», sonymen qatar «shekarada jabyq tsikl boiynsha barlyq protsesti basqarýmen» jáne importtalýshy taýarlardyń muqiiat dezinfektsiiadan ótýimen bailanysty sharalar da kúsheitildi.
16 tamyz kúngi saǵat 24:00-degi jaǵdai boiynsha, Shyńjańda koronavirýs juqtyrýdyń jańa jaǵdailary men basqa simptomsyz tasymaldaýshylar anyqtalmady.
Alashańqai qalasynda Eýraziialyq transkontinentaldyq kópirdiń mańyzdy transporttyq haby bolyp tabylatyn «Alashańqai» iri qurlyqtaǵy shekara ótkeli ornalasqan.
Sońǵy derekter boiynsha, qurlyqtyq Qytaidyń aýrýhanalarynda koronavirýs juqtyrǵan shamamen 2 myńǵa jýyq naýqas jatyr. El boiynsha, «delta» shtamy órshigen tustan bastap epidemiologiialyq qaýiptiń joǵary deńgeii 29 turǵyn aimaqta, al orta deńgeii 100-ge jýyq aimaqta tirkelgen.
