Qytaidyń Shyńjan-Uiǵyr avtonomiialyq ólkesinde (ShUAÓ) 100 kúnnen beri koronavirýs juqtyrý oqiǵasy tirkelgen joq, dep habarlaidy jergilikti Densaýlyq saqtaý jáne gigiena isteri komiteti.
«2020 jyldyń 31 mamyr 00:00 ýaqytyna sáikes, Shyńjan-Uiǵyr avtonomiialyq ólkesinde (Shyńjan óndiristik-qurylys korpýsyn qosqanda) jańa indet juqtyrý oqiǵasy anyqtalǵan joq jáne tirkelmegenine 104 kún boldy» delingen komitet habarlamasynda.
Aita ketsek, Shyńjan-Uiǵyr avtonomiialyq ólkesinde eń alǵash koronavirýs juqtyrǵan adam 23 qańtarda tirkeldi. Shyńjanda jalpy infektsiia juqtyrǵandar sany 76 adamǵa jetip, onyń úsheýi qaitys boldy.
«Ótken táýlikte qurlyqtyq Qytaida koronavirýs juqtyrýdyń 16 jańa faktisi tirkeldi (barlyǵy syrttan kelgen, Sychýanda – 11, Gýandýnda – 2, Ishki Mońǵoliia avtonomiialyq ólkesinde – 3)» delingen QHR Densaýlyq saqtaý jáne gigiena isteri memlekettik komitetiniń kún saiynǵy esebinde.
Qytaidyń meditsinalyq mekemelerinde koronavirýs juqtyrǵan 76 adam jatyr, ótken táýlikte 3 naýqas emdelip shyqty. Qaitys bolǵandar tirkelgen joq.
Sáýir bastalǵaly Qytaida COVID-19 juqtyrǵan, biraq aýrýdyń eshqandai belgileri joq adamdarǵa bólek statistika júrgiziledi. Ótken táýlikte virýs juqtyrǵan 16 adamda aýrýdyń eshqandai belgileri bolmaǵan. Qazirgi kúni mundai 397 naýqas meditsina qyzmetkerleriniń baqylaýynda.
Epidemiia bastalǵan ýaqyttan beri qurlyqtyq Qytaida COVID-19 juqtyrǵandardyń jalpy sany 83 017 adamǵa jetti, 78 307 naýqas emdelip, aýrýhanadan shyǵarylsa, 4634 adam qaitys boldy.
