Shymkentte jedel-járdem qyzmetinen bólek mobildik top táýlik boiy qyzmet kórsetip keledi. Emhanalar janynan qurylǵan 58 mobildi top búgingi kúnge deiin 15 myń naýqastyń úilerine baryp, meditsinalyq kómek kórsetken, dep habarlaidy "Ult aqparat".
Bastapqy meditsinalyq sanitarlyq kómek kórsetý tobynyń jetekshisi Jibek Seidalinanyń aitýynsha, shaqyrtýlardyń basym bóligi salqyn tiiý men dene qyzýynyń kóterilýi, qurǵaq jótelge bailanysty bolǵan.
«Eki aýysymmen jumys isteitin meditsina mamandary bir kúnde 15-ten astam naýqasty qaraidy jáne telefon arqyly keńester beredi. Dárigerler patsienttiń úiine barysymen dene qyzýyn ólshep, tamaǵyn qarap, ókpesin tyńdaidy. Eger naýqastyń jaǵdaiy aýyr bolsa, kezekshi aýrýhanaǵa jetkizedi. Sonymen birge, mobildi brigada qyzmetimen dispanserlik esepte turatyn 38 556 azamatqa dári-dármek úilerine jetkizildi»,-dedi Jibek Seidalina.
Budan bólek, mobildi brigada dispanserlik esepte turǵan 474 444 azamatqa qońyraý shalyp, juqpaly aýrýdyń aldyn alý boiynsha keńester berdi. Atqarylǵan jumystar qaladaǵy epidemiologiialyq jaǵdaidyń jaqsarýyna óz áserin tigizgen.
