Shymkenttik politseiler statistikalyq kórsetkishterdi burmalap, kózboiaýshylyqpen ainalysqan. Bul týraly qalalyq prokýratýrada ótken Úilestirý keńesinde sóz boldy, dep habarlaidy "Ult aqparat".
Qalalyq prokýratýranyń baspasóz qyzmetiniń málimetinshe, Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úilestirý keńesi májilisinde qylmyspen kúres jumystarynyń jaǵdaiyna taldaý jasalǵan. Quqyqbuzýshylyq profilaktikasyna tekseris nátijeleri qaralǵan.
Jiynda sóz alǵan qala prokýrory Maqsat Qojabaev qylmystyq quqyqbuzýshylyqtyń aldyn alý jáne boldyrmaý máselesine toqtaldy.
Zańdy qadaǵalaý ókilderiniń sózinshe, jyl basynan bergi 8 aida qylmys deńgeii 12% tómendegenimen, olardyń keibir túrleri ósken. Mal urlyǵy 11% jáne uialy telefondardy urlaý 12%, buzaqylyq 12%, zorlaý 5% ósken. Osydan keiin prokýrorlar tiisti tekserý jumystaryn júrgizgen. Nátijesinde politsiia departamenti men ákimdik tarapynan profilaktikalyq jumystarǵa salǵyrt qaraǵany anyqtaldy.
Eseptik kórsetkishti ádeii kemitken politsiia qyzmetkerleriniń áreketterinen statistikalyq kórsetkishter burmalanyp, qoǵamdyq oryndarynda jasalǵan quqyqbuzýshylyqtar sany 5,2% tómendegen. Iaǵni, 300 qylmys burmalanyp, shyn máninde qylmys 2% ósken. Sondai-aq, prokýrorlar jedel-izdestirý qyzmetkerleri 1426 istiń ashylýyna yqpal jasady degen aqpardy teksergen. Onyń nátijesi 247 qylmystyń jedel-izdestirý qyzmetkerleriniń kómeginsiz ashylǵany anyqtalyp, politsiia qyzmetkerleriniń kózboiaýshylyqpen ainalysqanyn kórsetken.
Qala aýlalaryn jaiaý aralap shyqqan qadaǵalaýshy organ ókilderi kóshelerdiń tolyq jaryqpen jáne beinekameralarmen qamtamasyz etilmegenine kóz jetkizgen. Profilaktikalyq is-sharalardyń sapasyzdyǵynan qala aýmaǵynda atys qarýyn qoldaný arqyly jasalǵan qylmystar sany 8,9% jáne olardyń qoǵamdyq oryndardaǵy kórinisi 18,5% ósken.
Osyndai kemshilikterge bailanysty qala prokýrory Maqsat Qojabaev barlyq basshylar tarapynan vedomstvolyq baqylaýdy kúsheitýdi, qylmystyń aldyn alýǵa jáne ashýǵa baǵyttalǵan barlyq zańdy is-sharalardy tolyq túrde atqarýǵa shaqyrdy. Keńes qorytyndysymen birqatar naqty usynystar ázirlendi.
