Shymkentte zańsyz qarý alyp júrgen kúdiktiler ustaldy, – dep habarlaidy QazAqparat.
Shymkent qalasy Politsiia departamentiniń qyzmetkerleri tótenshe jaǵdai kezinde qala aýmaǵyndaǵy qaýipsizdikti qamtamasyz etýde. Arnaiy is-sharalar barysynda ózimen birge qarýdy zańsyz alyp júrgen, sonymen qatar basqa da zań buzýshylyq jasaǵan birneshe kúdikti anyqtalyp, ustaldy.
Atap aitqanda, A.Asqarov kóshesiniń boiynda «Lexus RX-330» avtokóligin toqtatqan tártip saqshylary kólik ishinen atys tapanshasyn tapty. Atalǵan avtokóliktiń júrgizýshisi men jolaýshysy ýaqytsha ustaý izoliatoryna qamaldy.
8-shaǵynaýdan aýmaǵynda jedel is-sharalar júrgizý barysynda, ondaǵy jaldamaly páterlerdiń birin jalǵa alǵan 1995 jyly týǵan Almaty oblysynyń turǵyny men 1991 jyly týǵan Túrkistan oblysynyń turǵynyn tekserdi. Nátijesinde biriniń kúrteshesiniń qaltasynan 4 dana 5,45-mm kalibrli oq-dáriler jáne qol sómkesinen ártúrli markaly 42 dana uialy telefondar men 4 dana noýtbýk tárkilendi.
Sondai-aq, Patrýldik politsiia polkiniń inspektory ózine bekitilgen aýmaqty patrýldeý kezinde «Hundai Starex» markaly avtokólikti toqtatyp, tekserý kezinde kóliktiń jolaýshysy ózimen birge sholaq myltyq pen onyń oq-dárilerin alyp júrgenin anyqtaǵan. Qazirgi tańda kúdikti azamat ýaqytsha ustaý izoliatorynda.
Politsiia qyzmetkerlerimen qala joldarynda kezekshilik etý kezinde Asar shaǵynaýdanynyń aýmaǵynda «LADA-2114» avtokóliginen 1 dana bita men oq-dáriler anyqtalǵan.
Qarataý aýdany Politsiia basqarmasynyń qyzmetkerleri Nursat shaǵynaýdanyndaǵy jaldamaly páterlerdi tekserý kezinde, olardyń biriniń balkonynan úlken tastar taýyp alǵan.
Shymkent-Samara tas jolynda ornalasqan «Badam» buǵattaý beketinde «Toyota Land Cruiser» kóligin tekserý barysynda atys tapanshasy tabylyp, tárkilendi.
Atalǵan jaittar boiynsha qazirgi tańda qylmystyq ister tirkelip, sotqa deiingi tergep-tekserý jumystary júrgizilýde.
