Shymkentte kópirden sekirýge oqtalǵan 19 jastaǵy jigit qutqaryldy, dep habarlaidy "Ult aqparat" Polisia.kz portalyna silteme jasap.
Oqiǵa 23 qarasha saǵat 21.30 shamasynda bolǵan. Qala tynyshtyǵyn qadaǵalap júrgen Ulttyq ulan sarbazdary ajalǵa arasha tústi.
19 jastaǵy jigit Temirlan tas joly men Mangeldin kóshesiniń qiylysynda ornalasqan kópirden sekirýge oqtalǵan. Bailanys quraldary arqyly shuǵyl aqparat alǵan 6506 áskeri bóliminiń jasaqtar boiynsha kezekshisi aǵa leitenant Serjan Saǵynbek birden shara qoldanady. Ol dereý qaramaǵyndaǵy jaýyngerler - efreitor Nurdáýlet Orazbaev jáne qatardaǵy Vitalii Kochetkovpen birlesip, habarlamada kórsetilgen mekenjaiǵa kelip jetedi.
"Aqpartta aitylǵan jerge kelsek, rasymen de jas jigit kópirden ózin-ózi tastaýǵa daiyn tur eken. Birden oǵan bet alyp, raiynan qaitarýǵa tyrystyq. Ol “Ómir súrgim kelmeidi”, “Ólgim keledi” dep aiqailap jatty. Eptep kópir qorshaýynyń bergi jaǵyna ótkizdik", – deidi aǵa leitenant Serjan Saǵynbek.
Jedel ári kásibi túrde áreket etken áskeri qyzmetshiler jas jigitpen jaqynyraq sóilesip, bul nietiniń durys emestigin túsindirgen. Sol mańda júrgen azamattar da jigitti bul áreketinen bas tartýǵa shaqyrǵan.
Eki oily turǵan jigit sál tynyshtalǵanda, ulandyqtar men jolaýshylar ony uzaqtaý jerge alyp ketedi. Keiin oqiǵa ornyna kelgen quqyq qorǵaý qyzmetkerlerine tapsyrǵan.
Al, tártip saqshylary istiń mán-jaiyn anyqtaý maqsatynda 2003 jyly týǵan azamatty Abai aýdanynyń politsiia basqarmasyna alyp ketken.
