Foto: ashyq derekkóz
Shymkentte politsiia iri internet-alaiaqtyq dereginiń aldyn alyp, qart turǵynǵa urlanǵan qarajatyn qaitarýǵa kómektesti, dep habarlaidy Ult.kz.
Alaiaqtar zeinetkerge habarlasyp, ózderin bank qyzmetkerleri retinde tanystyrǵan. Psihologiialyq qysym jasap, túrli aila-tásilderdi qoldanyp, áieldi qupiia derekterin aitýǵa jáne belgili bir áreketter jasaýǵa kóndirgen. Sonyń saldarynan onyń banktik shotynan qomaqty qarjy zańsyz aýdarylǵan.
Jábirlenýshiniń aryzyna jedel áreket etken kiberpolitsiia qyzmetkerleri qajetti is-sharalar keshenin júrgizdi. Qabyldanǵan sharalardyń nátijesinde aqsha aýdarylǵan arna der kezinde anyqtalyp, qarajattyń ári qarai qolma-qol aqshaǵa ainaldyrylýyna jol berilmedi. Nátijesinde tártip saqshylary jábirlenýshige 9 mln teńgeni qaitaryp berdi.
Politseiler mundai qylmystardyń, ásirese, egde jastaǵy azamattarǵa qatysty jii kezdesetinin atap ótedi. Osyǵan bailanysty turǵyndardy saq bolýǵa shaqyrady. Jeke derekterdi, SMS-kodtardy jáne bank kartasynyń málimetterin eshkimge jariia etpeý qajet. Kúdikti qońyraý túsken jaǵdaida dereý politsiiaǵa habarlasyńyz.
