Shymkent qalasynda eki joǵary oqý orny bas litsenziiasynan aiyryldy. Olar - «Orda» (burynǵy «Silkway halyqaralyq ýniversiteti») men «Miras» ýniversitetteri, dep habarlaidy "Ult aqparat" Bilim jáne ǵylym ministrligine silteme jasap.
2020 jyly «Orda» jáne «Miras» ýniversitetterin tekserý barysynda bilim salasyndaǵy zańnamany óreskel buzý faktileri anyqtalǵan.
Eki joǵary oqý ornynyń qyzmeti toqtatylyp, olarǵa anyqtalǵan buzýshylyqtardy joiýǵa ýaqyt berildi.
Alaida joǵary oqý oryndary qatelikpen jumys júrgizbei, 8 ai komitettiń litsenziiany toqtata turý týraly sheshimine shaǵymdanýmen ainalysty.
Biraq sońynda sot komitettiń sheshimin óz kúshinde qaldyrý týraly sheshim qabyldady. Al ýniversitettiń kóptegen shaǵymdary qanaǵattandyrylmady.
Endi Shymkent qalasynyń mamandandyrylǵan aýdanaralyq ákimshilik sotynyń 1 shildedegi sheshimimen atalǵan eki joǵary oqý orny bas litsenziiasynan aiyryldy.
«Osy jyldyń mamyr aiynda qaita tekserý qorytyndysy boiynsha qateliktermen jumys júrgizilmegeni anyqtaldy. Eń basty másele kadrlardy daiarlaý sapasynda boldy. Mysaly, «Orda» Ýniversitetinde oqityndardyń 97%-y shekti baldan óte almady jáne oqý protsesinde alynǵan bilim men quzyretterdiń jetkilikti deńgeiin rastai almady. Eki joo-da kestege sáikes jappai sabaq ótkizbeý faktileri anyqtaldy. Aǵymdaǵy baǵalar qoiylmaǵan, bekitilgen kestege sáikes emtihandar ótkizilmegen, pánder tolyq kólemde oqytylmaǵan. Tiisti 5 kredittiń ornyna tek 3 kredit igerildi. Barlyq pán oqý-ádistemelik materialdarmen qamtamasyz etilmegen. Oqytýshylardyń bekitilgen pedagogikalyq júktemesi men onyń naqty oryndalýy arasynda úlken aiyrmashylyqtar bar, iaǵni oqytýshyda júktemede belgili bir pán boiynsha dáris oqý josparlanýy múmkin, al is júzinde ol ony oqymaidy», – dep atap ótti QR BǴM Bilim jáne ǵylym salasyndaǵy sapany qamtamasyz etý komitetiniń joǵary jáne joǵary oqý ornynan keiingi bilim berý salasyndaǵy baqylaý basqarmasynyń basshysy Elvira Saparbekova.
Buǵan deiin táýelsiz bilim sapasyn qamtamasyz etý agenttigi de osy joǵary oqý oryndaryn akkreditteýdi toqtatqan edi.
Sondyqtan bul ýniversitetter túlekterge diplom bere almaidy. Diplom alý jáne oqýdy aiaqtaý úshin stýdentter basqa ýniversitetterge aýysa alady.
Bul joǵary jáne (nemese) joǵary oqý ornynan keiingi bilim berý uiymdary qyzmetiniń úlgilik qaǵidalarynda kózdelgen.
QR «Bilim týraly» Zańyna sáikes bilim berý qyzmetimen ainalysýǵa arnalǵan litsenziiadan aiyrylǵan nemese bilim berý uiymy taratylǵan kezde quryltaishy bilim alýshylardy basqa bilim uiymdaryna aýystyrý úshin sharalar qabyldaidy.
