Foto: "Astana" telearnasy
Shymkentte birinshi kýrs stýdentiniń ólimine sebepker bolǵandar sottaldy, dep habarlaidy "Ult aqparat" "Astana" telearnasyna silteme jasap.
Jasóspirim kolledj jataqhanasynda soqqydan kóz jumǵan.
Búgin kámeletke tolmaǵandardyń isteri jónindegi mamandandyrylǵan aýdanaralyq sotta jataqhanadaǵy ólimge qatysty iske núkte qoiyldy. Qylmystyq isti qaraǵan sot tóraǵasy eki jasóspirimge 6 jyl 8 ai merzimge bas bostandyǵynan aiyrý jazasyn taǵaiyndady.
Sýdia Dáýren Saihanovtyń dereginshe, olardyń biri marqumdy temeki shekkeni úshin tártipke shaqyrmaq bolǵan kórinedi. Sodan eki jigit birinen soń biri keýde tusynan eki ret soqqy bergen, keiin marqum ózin jaisyz sezinipti. Ol jedel járdem kelgenshe jan tapsyrǵan. «Bul abaisyzda ólimge alyp kelgen jaǵdai ekeni eskerildi» deidi sýdia.
"Birinshiden, sot kámeletke tolmaǵanyn eskerdi. Ekinshiden, jábirlenýshi taraptan keshirim alyp, marqum balanyń anasymen tatýlasty. Qylmystyq kodekstiń 55 babynyń 2 bóligin qoldana otyryp, negizgi jazadan tómen jaza, biraq 6 jyl 8 aiǵa bas bostandyǵynan aiyrý jazasy taǵaiyndaldy. Negizi, qylmystyq kodekstiń 106-baby 3-shi bóliginde jazany óteý 8 jyldan bastalady" - dedi Shymkent qalasy kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy Dáýren Saihanov.
Úkim áli zańdy kúshine engen joq.
Sot tóraǵasynyń málimetinshe, marqumnyń ata-anasy kináli tarapqa keshirim bergenmen, atpaldai azamattyń ólimi olardy jazadan qutqarmaidy. Sondai-aq, kolledj tarapynan túsindirý jumystarynyń júrgizilmegeni de nazardan tys qalmady.
Aita keteiik, qaiǵyly oqiǵa byltyr 22 qyrkúiekte boldy.
