Foto: KazChess
Shymkent qalasynda bir ýaqytta eki iri halyqaralyq shahmat týrniri – Qazaqstan Respýblikasy Balalar kýbogynyń birinshi kezeńi «D.Á. Qonaev-2026 memorialy» jáne KazChess Masters Nauryz 2026 jarysy bastaldy, dep habarlaidy Ult.kz.
Balalar kýbogynyń alǵashqy kezeńi rekordtyq kórsetkishke jetip, 409 jas shahmatshyny jinady. Bul josparlanǵan 350 qatysýshydan áldeqaida kóp. Týrnirge Qazaqstanmen qatar Qyrǵyzstan, Resei, Tájikstan, Túrikmenstan jáne Ózbekstannan kelgen jas oiynshylar qatysýda. Jarys 14 jasqa deiingi jáne 10 jasqa deiingi sanattar boiynsha ótip, shveitsar júiesimen 9 týrǵa josparlanǵan. Jalpy júlde qory – 4 million teńge.
Foto: KazChess
Atalǵan týrnir jas talanttardy anyqtaityn negizgi alańdardyń biri sanalady. Ótken jyly qazaqstandyq jasóspirimder álemdik deńgeide joǵary nátije kórsetip, birneshe jas sanatynda altyn júlde jeńip alǵan bolatyn.
Sonymen qatar qalada eresekter arasynda ótetin KazChess Masters Nauryz 2026 týrniri de qatar bastaldy. Bul jarysta 10 shahmatshy ainalmaly júie boiynsha baq synaidy. Olardyń qatarynda bes qazaqstandyq jas talant pen reitingi 2600-den asatyn bes sheteldik grossmeister bar. Týrnirdiń júlde qory 25 million teńgeni quraidy, al jeńimpaz 7 million teńgege ie bolady.
Foto: KazChess
Aita keteiik, KazChess Masters týrniri qazaqstandyq shahmatshylar úshin grossmeisterlik normany oryndaýǵa jol ashady. Al balalar kýbogy bolashaq chempiondardy anyqtaýdyń mańyzdy kezeńi sanalady.
Osylaisha, Naýryz merekesi kúnderi Shymkent halyqaralyq shahmat ortalyǵyna ainalyp, álemdik deńgeidegi oiynshylar men jas talanttardy bir alańda toǵystyrdy.
Foto: KazChess
